Берасьцейскі гандбольны клюб імя Анатоля Мяшкова выйшаў у групавы турнір Лігі чэмпіёнаў, самага прэстыжнага гандбольнага клюбнага турніру.
Цягам гэтага ўік-энду нашы гандбалісты на хатняй пляцоўцы двойчы экзамэнавалі сэрбскую “Црвену Зьвезду”. Два матчы праходзілі ў Берасьці зь ініцыятывы прэзыдэнта балканскай каманды. Такі факт ня мог не сказацца станоўча на канчатковы вынік.
У суботу БГК імя А.Мяшкова перамагло з розніцай у восем галоў – 33:25. Назаўтра берасьцейцы перамаглі яшчэ больш пераканаўча - 38:28.
У групавым турніры супернікамі нашых хлопцаў будуць вугорскі “Пік”, славенскае “Гарэнье” і басьнійская “Босна”. Лёсаваньне досыць спрыяльнае.
Нагадаем, што ўжо чацьвёрты год запар выходзяць у групавы турнір Лігі чэмпіёнаў. Папярэднія спробы скончыліся ня вельмі ўдала – БГК імя А.Мяшкова стабільна займаў у групе апошняе месца. Паглядзім, што будзе на гэты раз.
