Чытачы паведамілі газеце «Наша Ніва», што на сталічным заводзе «Амкадор» на мінулым тыдні адбыўся страйк супрацоўнікаў ліцейнага цэха. Падставай стала затрымка выплаты заробкаў.
Паводле сайта «Рэвалюцыйнае дзеянне», супрацоўнікі вінавацяць у дрэнным фінансавым становішчы прадпрыемства дырэктара, які заняў пасаду год таму, і кіраўнічы персанал. Продажы гатовай прадукцыі знізіліся пасля ўступлення Расіі ў Сусветную гандлёвую арганізацыю.
У выніку, праз некалькі дзён пасля страйку завод пагасіў запазычанасці па выплаце заробкаў.
Кіраўніцтва завода адмаўляе факт страйку. Кіраўніца прэс-службы холдынга «Амкадор» Наталля Кузняцова назвала інфармацыю пра страйк на заводзе «недакладнай». Таксама прэс-служба не пацвердзіла і інфармацыю пра затрымку выплаты заробкаў.