Найлепшы спосаб пазбегнуць ва Украіне гвалту — гэта адмовіцца ад спансавання сепаратызму.
Пра гэта заявіў міністр замежных спраў Польшчы Радаслаў Сікорскі ў адказ на заяву кіраўніка расійскага знешнепалітычнага ведамства Сяргея Лаўрова пра тое, што гвалт на поўдні і ўсходзе Украіны робіць немагчымым правядзенне сумленных і празрыстых прэзідэнцкіх выбараў.
Выступаючы перад студэнтамі ў Познані, міністр адзначыў, што падзеі ва Украіне — гэта завяршэнне эпохі «пасля халоднай вайны».
«Гэта канец эпохі, калі здавалася, што вайна ў Еўропе немагчымая. Сёння мы жывем у Еўропе, у якой упершыню пасля Другой сусветнай вайны адна еўрапейская дзяржава забрала тэрыторыю ў іншай еўрапейскай краіны», — адзначыў ён.
Міністр таксама адказаў на пытанні студэнтаў, ці верагодная акупацыя Расіяй іншых тэрыторый, прычым не толькі ва Украіне:
«Спадзяюся, што не, але баюся, што так».
