Чытач «Нашай Нівы» паведаміў, што ў 65-й аўтамабільнай брыгадзе ў Жодзіне (в/ч 28729) адбылося масавае атручванне жаўнераў.
30 вайскоўцаў адчулі сябе дрэнна ў нядзелю 21 верасня.
«Усё пачалося яшчэ ў нядзелю ўвечары. Мы, як звычайна, схадзілі на вячэру, і праз некалькі гадзін некаторым з нас зрабілася блага. Усю ноч нашы хлопцы бегалі ў прыбіральню ванітаваць. Некаторых даймаў панос. Раніцай у панядзелак у некаторых паднялася тэмпература да 38. 28 чалавек адразу адправілі ў санчастку, якая ўсё папаўняецца. Нам забаранілі звальненні і наведванні вайскоўцаў зараз дазваляюцца толькі без ежы», — паведаміў адзін з вайскоўцаў, што праходзіць службу ў гэтай частцы.
Гэтую інфармацыю пацвердзіла «НН» сваячка яшчэ аднаго жаўнера тэрміновай службы.
Хлопец расказаў, што палова з хворых салдат знаходзіцца на лячэнні ў медсанчастцы. Ён таксама дадаў, што, на ягоную думку, вайскоўцы атруціліся адной з бацькоўскіх перадач, якую разам спажывалі.
Міністэрства абароны адмаўляе факт хваробы вайскоўцаў.
«Гэтая інфармацыя абсалютна не адпавядае рэчаіснасці», — паведаміў «Нашай Ніве» прэс-сакратар міністэрства Уладзімір Макараў.
