Прэзідэнт Еўрапейскай камісіі Жан-Клод Юнкер адмовіўся назваць Украіну еўрапейскай дзяржавай, каб прадухіліць прызнанне права Украіны падаваць заяўку на сяброўства ў ЕС.
Гэта адбылося на прэс-канферэнцыі па выніках саміту Украіна—ЕС у Кіеве, паведамляе Еўрапейская праўда.
Пра тое, што Украіна мае намер падаць такую заяўку, паведаміў прэзідэнт Пётр Парашэнка.
Як вядома, статутныя дакументы ЕС утрымліваюць абмежаванні — заяўку на атрыманне сяброўства могуць падаваць толькі «еўрапейскія дзяржавы». Еўрасаюз пазбягае такога вызначэння ў дакументах, якія тычацца Украіны.
Падчас прэс-канферэнцыі Юнкер адмовіўся наўпрост адказваць на пытанне, ці з'яўляецца Украіна еўрапейскай дзяржавай, але не выключыў, што ЕС зробіць такое прызнанне пазней.
«На мой погляд, Украіна — частка еўрапейскай сям'і. Не афрыканскай, а еўрапейскай», — пазбег ён ужывання такога тэрміна, часткова паўтарыўшы сваю папярэднюю заяву.
У той жа час, прэзідэнт Парашэнка настойвае, што Украіна мае права падаць такую заяўку.
«49 артыкул дамовы дае права ўсім еўрапейскім краінам падаваць заяўку на атрыманне сяброўства ў ЕС, а Украіна — гэта еўрапейская краіна», — падкрэсліў прэзідэнт Украіны.
