Восем адміністрацыйных пратаколаў за парушэнні Правілаў дарожнага руху складзена ў дачыненні да вадзіцеля, які ў п'яным стане ўчыніў на Мінскай кальцавой аўтадарозе некалькі ДТЗ.
Як паведаміла старшы інспектар па агітацыі і прапагандзе аддзела ДАІ Цэнтральнага РУУС Мінска Анастасія Радзько, 18 кастрычніка прыкладна ў 18.20 мужчына 1950 года нараджэння, кіруючы аўтамашынай «Пежо-Эксперт», рухаўся па МКАД з боку Даўгінаўскага тракту ў напрамку праспекта Пераможцаў. Пры невыкананні бакавога інтэрвалу ўчыніў сутыкненне з аўтамашынай «Шкода», якая рухалася ў спадарожным напрамку, і з месца ДТЗ уцёк.
Затым у раёне праспекта Пераможцаў таксама пры невыкананні бакавога інтэрвалу сутыкнуўся з аўтамашынай «БМВ» і таксама ўцёк з месца здарэння.
У раёне вуліцы Ціміразева зноў з-за невыканання бакавога інтэрвалу вадзіцель учыніў сутыкненне з аўтамашынай «Міцубісі» і прадоўжыў рух па МКАД.
Затрымалі вадзіцеля супрацоўнікі ДАІ Цэнтральнага раёна прыкладна ў 18.40 на скрыжаванні МКАД з вуліцай Кіжаватава. Вадзіцель знаходзіўся ў стане алкагольнага ап'янення (1,75 праміле) і пры гэтым не меў права кіравання.
Пацярпелых у ДТЗ няма, аўтамабілі атрымалі механічныя пашкоджанні.
