Знішчальнікі Каралеўскіх ваенна-паветраных сіл Вялікабрытаніі нанеслі першыя авіяўдары па баевіках экстрэмісцкай групоўкі «Ісламская дзяржава» ў Сірыі, паведамляе мінабароны краіны.
Чатыры знішчальнікі-бамбавікі Tornado падняліся ў паветра з вайсковай авіябазы Акраціры на Кіпры неўзабаве пасля таго, як брытанскі парламент афіцыйна падтрымаў бамбардзіроўкі.
У сераду парламентарыі большасцю галасоў прагаласавалі за рашэнне пачаць авіяўдары па пазіцыях ІД у Сірыі.
За такое рашэнне выказаліся 397 членаў парламента, а супраць бамбёжак — 223. Дэбаты перад галасаваннем працягваліся каля 10 гадзін.
Вялікабрытанія ўжо больш за год ўдзельнічае ў бамбаваннях пазіцый ІД у Іраку. Аднак прэм'ер-міністр Дэвід Кэмеран выступіў за пашырэнне аперацыі і на тэрыторыю Сірыі.
