У 2016 годзе ў беларускай эканоміцы захаваецца рэцэсія, нягледзячы на запаволенне яе падзення ў першай палове года. Так пракаментавалі аналітыкі «Сбербанка» вынікі сацыяльна-эканамічнага развіцця Беларусі ў першай палове года.
«Мы не чакаем значнага паляпшэння дынамікі ВУП па выніках 2016 года. Скарачэнне эканомікі працягнецца, а выхад на траекторыю росту магчымы не раней за 2017 год. Аднак і тады істотнае паскарэнне малаімавернае», — прагназуюць аўтары эканамічнага агляду Цэнтра макраэканамічных даследаванняў расійскага «Сбербанка».
На думку экспертаў, крыніц росту, якія б дазволілі вывесці беларускую эканоміку з рэцэсіі ў гэтым годзе, пакуль няма.
Аб'ёмы падзення прамысловай вытворчасці па выніках паўгоддзя сталі меншымі, чым у першым квартале, аднак перспектывы яе нарошчвання абмежаваныя, адзначаюць аналітыкі «Сбербанка». «Вярнуцца да росту прамысловасці перашкаджае хімічная вытворчасць, якая ў першым паўгоддзі скарацілася больш за астатнія галіны (на 11,2%). Цалкам лагічны вынік, улічваючы падзенне попыту на сусветным рынку калійных угнаенняў і, як следства, зніжэнне цэнаў на ўгнаенні», — гаворыцца ў аглядзе.
З іншага боку, адзначаюць эксперты, у Беларусі на фоне зніжэння рэальных даходаў насельніцтва скарачаецца спажыванне, «якое найбліжэйшым часам застанецца асноўным фактарам стрымлівання для аднаўлення эканомікі». «Скарачэнне ўнутранага гандлю (12,3% у структуры ВУП) паскорылася да мінус 4,2% у першым паўгоддзі, супраць мінус 3,1% у першым квартале», — канстатуюць аналітыкі «Сбербанка».
У цяперашняй сітуацыі, калі прамысловая вытворчасць і спажыванне застаюцца адмоўнымі, расійскія эксперты не бачаць перадумоў для хуткага аднаўлення беларускай эканомікі. Яны мяркуюць, што выхад у зону анэмічнага эканамічнага росту ў Беларусі магчымы «не раней за 2017 год».
«У больш доўгатэрміновай перспектыве беларускі эканамічны рост застанецца залежным ад эканамічнага росту Расіі. Нашы разлікі паказваюць, што паскарэнне росту ў Расіі на адзін працэнтны пункт дадае 0,7 працэнтнага пункта ў рост Беларусі», — лічаць аналітыкі «Сбербанка». Паводле іх ацэнкі, у выпадку аднаўлення росту эканомікі Расіі штогадовы рост ВУП Беларусі ў 2018—2020 гадах можа складаць 2—3%.
Як паведамлялася раней, па выніках першай паловы 2016 года ВУП Беларусі знізіўся на 2,5%. Афіцыйны прагноз, які прадугледжвае рост эканомікі на 0,3% у бягучым годзе, пакуль не пераглядаўся.
