На пачатку ліпеня скончылася раследаванне трагікамічнай крымінальнай справы.
Канфлікт паміж бацькам і сынам адбыўся яшчэ ў красавіку. На працягу дня п’яны вясковец з-пад Пінска сварыўся з жонкай і 26-гадовым сынам. Падчас канфлікту ён паказаў сваякам сумку, у якой было больш за 165 г сцеблаў, а таксама лісце маку.
Мужчына паабяцаў, што выкліча міліцыю і раскажа, што ў доме захоўваюцца наркотыкі.
Сваё абяцанне п’яны вясковец стрымаў. Ён патэлефанаваў участковаму інспектару і сказаў, што сын захоўвае і ўжывае наркотыкі.
Сумку з макам ён аднёс сыну на ложак і пайшоў да суседа. Хлопец жа ператэлефанаваў па тым жа нумары і растлумачыў, што забароненыя рэчывы ў дом прынёс бацька.
На месца здарэння прыехала следча-аператыўная група, мак канфіскавалі.
Фота - Следчы камітэт
Але затрымалі не сына, як спадзяваўся бацька, а яго самога.
Мужчыну змясцілі пад варту.
Сваю віну падазраваны прызнаў цалкам і ў зробленым раскаяўся. Са слоў падследнага, пасля сваркі з роднымі ён хацеў іх прыстрашыць, каб тыя яго слухаліся і паважалі.
У дачыненні да вяскоўца распачалі дзве крымінальных справы. Мужчыну вінавацяць у захоўванні і распаўсюдзе наркатычных рэчываў і лжывым даносе.
Матэрыялы справы перадалі ў суд.