Ларыса Бельская. Фота: geneva.mfa.gov.by
«Не самы паспяховы менеджар», «служка», «мяккі чалавек»
Ларыса Бельская нарадзілася ў Мінску. Ёй 60 гадоў. Яна выпускніца гістарычнага факультэта БДУ. Пасля некалькіх гадоў выкладчыцкай і даследчай дзейнасці ў 1994-м уладкавалася ў Міністэрства замежных спраў.
Бельская працавала ў розных яго структурах. Напрыклад, была першым сакратаром пасольства Беларусі ў ЗША (2004—2008), дарадцай Пастаяннага прадстаўніцтва Беларусі пры ААН (2012—2016), дарадцай-пасланнікам беларускага пасольства ў Вялікабрытаніі.
Калегі пра Бельскую кажуць, што яна «не вельмі арганізаваная і не самы паспяховы менеджар». Па характары — мяккі чалавек. Але пры гэтым працавітая і актыўная. Дамагалася пасад не па блаце, а стараннасцю і настойлівасцю.
Бельская — бюракрат, «аддананы вельмі дакладнаму выкананню абавязкаў і даручэнняў, якія на яе ўскладваюцца», дадае былы дыпламат Павел Латушка.
«Яна служка, якая будзе рабіць тое, што загадаюць зверху», — лічыць ён.
Ён параўноўвае службоўку з верным салдатам, які будзе стукаць абцасамі і выконваць кожны загад.
Па звестках «Белпола», Бельская не замужам, дзяцей у яе няма.
«Жалезная лэдзі»
Лукашэнка прызначыў Бельскую пастаянным прадстаўніком Беларусі пры Аддзяленні ААН у Жэневе 10 лютага 2022 года. Тады яна пахвалілася, што мае добры вопыт перамоўнай працы менавіта ў Нью-Ёрку, бо яна там шмат працавала.
Бельская сказала, што ў Еўропе у яе склаўся вобраз «жалезнай лэдзі». «Наогул казалі: Larisa, you make people crazy [ты зводзіш людзей з розуму]», — дзялілася яна.
Так яна хацела падкрэсліць сімпатыі да былога прэм'ер-міністра Вялікабрытаніі Маргарэт Тэтчэр.
Скрын відэа СТБ
Гэтым яна падкрэслівае сваю выканальнасць, заўважаюць калегі.
«Калі былі ліберальныя часы, то і рыторыка, і погляды Бельскай былі іншыя, — адзначае адзін з іх. — Гэта тыповыя паводзіны чыноўніка-кар'ерыста — падладжвацца пад вецер».
Замяніла адыёзнага Амбразевіча
Павел Латушка перасякаўся з Бельскай, калі яна кіравала сакратарыятам Міністэрства замежных спраў (гэта былі 1999—2002 гады). Тады знешнепалітычнае ведамства ўзначальвалі Урал Латыпаў і Міхаіл Хвастоў. Абодва ў лукашэнкавым асяроддзі таго часу лічыліся лібераламі. Рабілі спробы палепшыць адносіны з заходнімі краінамі.
Ларыса Бельская на нарадзе ў Лукашэнкі. Фота: скрын відэа ctv.by
Павел Латушка лічыць, што для Бельскай прызначэнне пастаянным прадстаўніком Беларусі пры Аддзяленні ААН у Жэневе — вяршыня дыпламатычнай кар'еры.
На гэтай пасадзе яна замяніла адыёзнага Юрыя Амбразевіча. Ён ініцыяваў выхад Беларусі з шэрагу міжнародных канвенцый, якія бароняць правы чалавека. Бельская трымаецца таго ж курсу.
«Палітычных зняволеных няма»
Бельская найчасцей хваравіта рэагуе ў сваіх выступах на парушэнні правоў чалавека ў Беларусі.
Паводле яе, «беларуская дзяржава мірна развівае і паляпшае ўмовы для ўсіх правоў чалавека» насуперак санкцыям і ізаляцыі на міжнароднай арэне.
Рэпрэсіі ў Беларусі чыноўніца называе «законнымі дзеяннямі праваахоўных органаў у стрымліванні загадзя падрыхтаваных і фінансаваных з-за мяжы беспарадкаў».
У свежым сваім выступе Бельская абвінаваціла экспертаў упраўлення ААН па правах чалавека ў тым, што яны, ацэньваючы сітуацыю ў Беларусі, выкарыстоўваюць двайныя стандарты.
«У Беларусі няма палітычных зняволеных. Асобы, якія адбываюць пакаранне, асуджаныя за канкрэтныя злачынствы, у тым ліку супраць нацыянальнай бяспекі. У Беларусі да парушальнікаў закона ставяцца аднолькава, незалежна ад таго, што яны з'яўляюцца фаварытамі замежных палітыкаў або дзейнічаюць у іх інтарэсах», — выступала яна.
«Хочацца запытацца ў Бельскай, а калі яе роднага чалавека пасадзілі б у турму і трымалі ў статусе інкамунікада, як Мікалая Статкевіча, ад якога няма вестак больш за 400 дзён, ці лічыла б яна, што гэта адбываецца ў межах нацыянальнага заканадаўства?» — задаецца пытаннем Павел Латушка.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Глядзіце таксама:
Патэнцыйны пераемнік Макея даў вялікае інтэрв'ю, у якім пакляўся ў вернасці сістэме і Расіі
За кулісамі Генасамблеі ААН: вось як Лукашэнка прайграў Славеніі 38:153
