УУС аблвыканкама прызнала факт збіцця медыка і лічыць такія дзеянні абгрунтаванымі.
На сайце Упраўлення ўнутраных спраў Гродзенскага аблвыканкама з’явілася афіцыйнае тлумачэнне прычын інцыдэнту у Ваўкавыскай цэнтральнай раённай бальніцы паміж супрацоўнікамі ДАІ і дзяжурным доктарам.
«Інцыдэнт, які адбыўся ў Ваўкавыскай цэнтральнай раённай бальніцы з удзелам супрацоўнікаў ДАІ і дзяжурнага лекара, выклікаў пэўны грамадскі рэзананс. Некаторыя друкаваныя і электронныя СМІ, не чакаючы праверкі і высвятлення ўсіх абставінаў таго, што адбылося, паспяшаліся напоўніць інцыдэнт «шакуючымі» падрабязнасцямі. Як вынік — скажэнне і перабольшанне рэальных падзей». Па версіі гродзенскай міліцыі, у ноч на 16 ліпеня ў нарад ДПС ДАІ УУС Гродзенскага аблвыканкама даставіў у Ваўкавыскую бальніцу кіроўцу, якога затрымалі па падазрэнні ў кіраванні аўто ў нецвярозым стане. За тое самае яго ўжо затрымлівалі ў красавіку гэтага года. Па сведчаннях даішнікаў, у прыёмным пакоі ім больш чым паўгадзіны давялося чакаць дзяжурнага доктара, а між іншым, адзначаецца на сайце УУС, згодна п.8 «Палажэння аб парадку правядзення медыцынскага агляду іншых асоб для ўстанаўлення факта ўжывання алкаголю, наркатычных і таксікаманічных сродкаў і стану ап'янення» асобы, якія падлягаюць агляду, павінны быць дастаўленыя да месца агляду або з'явіцца самастойна не пазней двух гадзін з моманту ўзнікнення акалічнасцяў, якія патрабуюць яго правядзення.
Доктар не спяшаўся выконваць сваю працу і ў інспектараў з’явілася падазрэнне, што ён наўмысна зацягвае працэдуру праверкі затрыманага, каб даць магчымасць таму пазбегнуць адказнасці, гаворыцца ў афіцыйнай версіі.«Просьбу супрацоўнікаў ДАІ паскорыць працэдуру агляду дзяжурны лекар ўспрыняў як асабістую абразу і прыніжэнне яго прафесійнага ўзроўню. У сваю чаргу міліцыянты спрабавалі растлумачыць неабходнасць захавання часовых рамак. Узнікла славесная сварка. Доктар ў катэгарычнай форме заявіў супрацоўнікам ДАІ, каб яны пакінулі памяшканне, а пасля прапанаваў дастаўленаму правапарушальніку перайсці ў іншы кабінет.
Калі дзяржаўтаінспектар паспрабаваў прайсці з імі, урач стаў яго выштурхоўваць, парваўшы пры гэтым форменнае абмундзіраванне. У мэтах спынення вышэйпаказаных дзеянняў супрацоўнікам міліцыі давялося прымяніць фізічную сілу».Інспектару, якога нібыта выштурхоўваў лекар, у выніку сутычкі спатрэбілася медычная дапамога.
Прававая ацэнка абодвум бакам канфлікту будзе дадзена па завяршэнні праверкі, якую праводзяць пракуратура Гродзенскай вобласці і служба ўласнай бяспекі, піша сайт УУС.
Варта адзначыць, што ў артыкуле газеты «Вечерний Гродно», прысвечаным здарэнню ў Ваўкавыску, акрамя версіі падзей, выкладзеных доктарам бальніцы і яго калег, былі змешчаныя каментары начальніка аддзялення агітацыі і прапаганды ДАІ УУС Гродзенскага аблвыканкама Яўгена Дудко, начальніка следчага аддзялення Ваўкавыскага РАУС Аляксандра Добаша і начальніка аддзялення інфармацыі і грамадскіх сувязяў УУС аблвыканкама Георгія Еўчара, а таксама тлумачэнні, як павінна адбывацца экспертыза, лекара-псіхіятра кабінета экспертызы Гродзенскага абласнога цэнтра «Псіхіятрыя-наркалогія» Рамана Германовіча.
