Устаноўлены новыя памеры платы за карыстанне студэнцкімі інтэрнатамі

Пастановай Савета міністраў № 1420 ад 24 кастрычніка 2011 года ўстаноўлены новыя памеры платы за карыстанне інтэрнатам вучэбных устаноў Беларусі, паведаміла прэс-служба ўрада.

Плата за карыстанне інтэрнатам цяпер будзе залежаць ад камфортнасці і ўмоў пражывання студэнтаў і навучэнцаў. З гэтай мэтай усе інтэрнаты раздзелены на тры катэгорыі. Самым дарагім стане пражыванне ў інтэрнаце 1-й катэгорыі. Да іх адносяцца новабудоўлі з блакаванымі памяшканнямі, у якіх ёсць пакоі, санвузел і кухня. Пражыванне ў інтэрнаце 2-й катэгорыі будзе таннейшым, таму што кухня агульнага карыстання знаходзіцца на паверcе, а ў блоку ёсць толькі пакоі і санвузел. У інтэрнаце 3-й катэгорыі кухні, санвузлы, душавыя памяшканні — агульнага карыстання.

Для студэнтаў ВНУ і факультэтаў даўніверсітэцкай падрыхтоўкі плата за пражыванне ў інтэрнатах будзе дыферэнцыяванай.

Яны будуць плаціць тры базавыя велічыні (105 тыс. рублёў) за пражыванне ў інтэрнаце 1-й катэгорыі, дзве (70 тыс. рублёў) — 2-й катэгорыі, адну (35 тыс. рублёў) — 3-й катэгорыі.

Для іншых катэгорый навучэнцаў устаноўлены іншыя памеры платы. Згодна з пастановай, навучэнцы, якія жывуць ва ўсіх катэгорыях інтэрнатаў і атрымліваюць агульную сярэднюю адукацыю, будуць плаціць 0,25 базавай велічыні, навучэнцы ПТВ — 0,4 базавай велічыні (14 тыс. рублёў), навучэнцы ССНУ — 0,7 базавай велічыні (24 тыс. 500 рублёў).

У 2010/2011 навучальным годзе ў дзяржаўных установах адукацыі мелі патрэбу ў месцах у інтэрнаце прыблізна 196 тыс. чалавек, з іх жылі ў інтэрнаце прыблізна 151 тыс. Забяспечанасць месцамі ў інтэрнаце ў ВНУ склала 68,2%, у ССНУ — 84,4%, у ПТВ — 96,5%. Цяпер плата за карыстанне інтэрнатам складае ад 8 тыс. 750 рублёў для навучэнцаў ПТВ да 15 тыс. 750 рублёў для студэнтаў. Такі памер платы не пакрывае расходы бюджэту па ўтрыманні інтэрнатаў дзяржаўных устаноў адукацыі.

Марына Носава, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ