БТ: Някляеў атрымаў грошы ад Польшчы на арганізацыю Плошчы 26

У эфіры канала «Беларусь-1» з’явілася чарговае «расследаванне» Агенцтва тэлевізійных навінаў, прысвечанае дзейнасці апазіцыйных структур. Фільм «Урокі польскай» грунтуецца на матэрыялах ад лукашэнкаўскіх спецслужбаў. Ён выкрывае Польшчу і падтрымку ёю антырасейскіх сілаў у Беларусі.

Як выявілася,

палова «расследавання» расказвала пра дзейнасць аднаго з жыхароў Віцебска, якія нібыта меў прыязныя адносіны з польскім консулам, таму мог афармляць шэнгенскія візы для іншых беларусаў.

За кожную з іх ён прасіў 100 еўра.

Другая частка фільма прысвечана «падрыўной» дзейнасці польскіх дыпламатаў, пра што мусяць сведчыць іх сувязі з Алесем Міхалевічам.

Паказваецца шмат запісаў допытаў экс-кандыдата ў прэзідэнты, дзе той часам кажа не надта прыемныя словы пра супрацоўнікаў амбасады.

Нарэшце, прапагандысты паказваюць дакумент, нібыта з Вікілікс, з якога вынікае што Уладзімір Някляеў атрымаў грошы на правядзенне Плошчы-2010.

Маўляў, за гэтыя грошы і былі закупленыя намёты і спальнікі для трох тысяч чалавек.

КДБісты не хаваюць, што вядуць схаваны запіс таго, што адбываецца на ўваходзе ў польскую амбасаду. Здымкі робяцца з вокнаў суседняга дома. У кадры пабывалі Вячорка, Дзмітрыеў, Някляеў, Янукевіч ды іншыя палітыкі.

ЯМ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ