Жыхар Рэчыцы забіў сужыцельку і цяжка параніў участковага інспектара міліцыі, які прыбыў на выклік.
Як паведамілі ва ўпраўленні Следчага камітэта па Гомельскай вобласці, трагедыя здарылася напярэдадні праваслаўнага Вялікадня, 14 красавіка. У дзяжурную часць Рэчыцкага РАУС паступіла паведамленне ад жыхаркі райцэнтра 1985 года нараджэння, што да яе ў дом спрабуе трапіць сужыцель, з якім яна ў сварцы, і цяпер адбываецца скандал. На месца здарэння быў накіраваны ўчастковы інспектар, капітан міліцыі 1983 года нараджэння.
Калі ён прыбыў па названым адрасе, дзверы ў дом былі адкрыты насцеж, на падлозе ляжала жанчына, а каля яе сядзеў мужчына. Міліцыянер паспрабаваў яго затрымаць, але зламыснік аказаў супраціўленне, пры гэтым цяжка параніў супрацоўніка РАУС нажом, і ўцёк.
Жанчына памерла ад нанесеных нажавых раненняў. У кватэры падчас забойства знаходзілася яе дзіця.
Участковы патэлефанаваў у дзяжурную часць, на месца трагедыі прыехалі хуткая і міліцыя. Супрацоўніка РАУС даставілі ў стане непрытомнасці ў рэанімацыю, потым зрабілі аперацыю. Цяпер ён у бальніцы.
Раніцай 15 красавіка падазроны — мясцовы жыхар 1965 года нараджэння, раней не судзімы, на ўліках не стаяў, быў затрыманы на адной з цэнтральных вуліц Рэчыцы. Па гэтым факце распачаты дзве крымінальныя справы: адна на падставе арт. 139 КК (забойства) і другая на падставе арт. 364 (насілле ў дачыненні да супрацоўніка міліцыі, які выконваў свае службовыя абавязкі).
