БНФ стварае шырокую кааліцыю
Выглядае, што дэклярацыі Вінцука Вячоркі на леташнім зьезьдзе БНФ пра захаваньне лідэрства Фронту і шырокую кааліцыю зь іншымі грамадзкімі сіламі ажыцьцяўляюцца ў рэальнасьці. Пра гэта ў мінулую суботу на Сойме БНФ гаварыў намесьнiк старшынi Фронту з Магiлёва Анатоль Фёдараў. Маўляў, фронтаўцы мусяць шчыльна кантактаваць з партыямі, прафсаюзамі, грамадзкiмi арганiзацыямi, незалежнай прэсай — тымi, хто стаiць на прынцыпах незалежнасьцi Беларусi. Варта нагадаць, што менавіта цураньне такога партнэрства, асабліва з прэсай, прывяло ў свой час да пэўнай ізаляцыі Фронту і, урэшце, да расколу гэтае арганізацыі на леташнім зьезьдзе.
Як вынікае з дакладу Фёдарава, кааліцыя патрэбная БНФ для фармаваньня новых рэгiянальных камандаў зь людзей, якiя пасьля падзеньня рэжыму здольныя будуць узяць на сябе ўвесь цяжар улады. Іншымі словамі, пасьля Лукашэнкі ня мусіць быць вакууму ўлады ані ў сталіцы, ані ў рэгіёнах.
Вiнцук Вячорка аналізаваў на Сойме «Вясну—2000», у прыватнасьцi, Дзень Волi 25 сакавiка: «Рэжым паказаў, як ён ставiцца да незалежнасьцi, паказаў свой твар i Пуцiн, якi, безумоўна, таксама стаяў за ўсiм, што адбывалася. Пасьля 25 сакавiка бальшыня мiжнародных арганiзацыяў прыйшла да высновы, што дэмакратычнай сытуацыi ў Беларусi не iснуе, ня будзе, адпаведна, i нiякiх дэмакратычных выбараў», — сказаў старшыня БНФ.
Выступоўцы на Сойме БНФ казалі пра тое, што Чарнобыльскі Шлях — 2000, які адбудзецца праз два тыдні, мусiць стаць адной з самых значных акцыяў веснавой кампанii i будзе насiць агульнанацыянальны характар. Акцыя пройдзе пад лёзунгам «Мы — народ!»
С.П.
