Дэпутат-лукашэнкавец Сяргей Касьцян прапанаваў увесьці прымусовую стэрылізацыю для асацыяльных асобаў. Як Вы ставіцеся да гэтае ідэі, і ці ёсьць чалавек, якога б Вы жадалі стэрылізаваць?
Тацяна Нарэйка, маці, 34 гады:
— Я хварэю на цукровы дыябэт. Такім, як я, дактары настойліва прапануюць стэрылізацыю. Цяжарнасьць пагражае жыцьцю такіх жанчын. У шпіталі, дзе я ляжала, жанчыны малілі дактароў не перавязваць ім трубы пад наркозам, бо хадзілі чуткі, што так робяць. Я здолела выжыць і нарадзіць дзіця. Чалавек, які прапануе стэрылізацыю, відаць, мае кулю ў галаве. Ці імпатэнт.
Сьвятлана Нячай, літаратарка, 32 гады:
— Такога чалавека няма. Я адмоўна стаўлюся да самой ідэі гвалтоўнай стэрылізацыі. Хто гэта будзе вызначаць, дзе ніжэйшыя слаі грамадзтва, а дзе вышэйшыя і якую задачу той ці іншы чалавек выконвае сваім жыцьцём?
Надзея Аўсіевіч, кіраўніца пінскай ГА «Калегіюм»:
— Я і падумаць пра гэта не магу. А па якіх крытэрах адбіраць? А хто будзе прымаць рашэньне? Дурата нейкая.
Ігар Варашкевіч, музыка з «Крамы»:
— Чалавек, якога я б ахвотна стэрылізаваў, існуе. Але я не скажу, хто гэта.
Павал Урбановіч, 25 гадоў, этнасацыяпсыхоляг:
— Такога чалавека няма. Гэтая прапанова — звычайны фашызм. Мальтузіянства.
Ігар, прадае аліву:
— Першым трэба было б кастрыраваць тату дэпутата.
Алег Гулак, праваабаронца:
— На маю думку, няма сэнсу ўвогуле ацэньваць словы дэпутата Касьцяна з пункту гледжаньня абароны правоў чалавека. Такія ідэі сёньня могуць прыйсьці толькі ў вельмі спэцыфічную галаву. Апошні раз я сустракаў такія выказваньні ў дзеячаў нацысцкае Нямеччыны. Цікава, як адрэагавала на гэта прэса, дзяржаўныя СМІ? Яны паспрабавалі хіхікнуць наконт гэтага — і ўсё. Відавочна, што разбудаваныя дзяржаўныя СМІ ня могуць крытыкаваць афіцыйнай пазыцыі афіцыйных дэпутатаў, якая б яна ні была. А выказваньне такое дзікае, што гэта якраз падстава для памфлету, публіцыстычных зьдзекаў.
Вацлаў Арэшка, культуроляг:
— Самога дэпутата. Такія прапановы ўжо гучалі, гэта адсылае нас да фашыстоўскіх часоў.
Уладзіслаў Завальнюк, рыма-каталіцкі сьвятар:
— Гэта вельмі прыкрае слова. Па-другое, трэба выхоўваць людзей, іначай усё гэта будзе вайной зь ветракамі. Замест таго, каб паставіць ачышчальныя збудаваньні ўздоўж усёй ракі, мы ставім іх у самым нізе. А на працягу ўсёй ракі працягваем пляваць у яе...
Аляксандар Шымбалёў, праваслаўны сьвятар:
— Нікога! Па-першае, усякі чалавек можа пакаяцца, перамяніць сябе. У тым ліку п’яніцы і бамжы. Па-другое, кожны чалавек стварае сваё жыцьцё з дапамогай сваёй волі. Бог даў кожнаму свабодную волю. І калі мы пачнём некага стэрылізаваць, то парушым волю, якую даў Бог.
Апытвалі Сьвятлана Курс, Зьміцер Дзядзенка