Бялькевіч сыходзіць са зборнай
Паўабаронца кіеўскага «Дынама» Валянцін Бялькевіч вырашыў больш не выступаць за нацыянальную зборную ды папрасіў галоўнага трэнэра Анатоля Байдачнага не выклікаць яго на кастрычніцкія матчы адборачнага турніру чэмпіянату сьвету супраць Шатляндыі і Нарвэгіі.
32-гадовы футбаліст пракамэнтаваў рашэньне ў інтэрвію газэце «Прессбол»: «Я прыняў рашэньне, што ў наступным адборачным раўндзе выступаць за зборную ня буду. Калі ён пачнецца, мне пойдзе 34-ты год. Гады. А раз так, ня бачу ніякага сэнсу ўдзельнічаць у заключных матчах за зборную ў гэтым кваліфікацыйным цыклі, якія ўжо нічога не вырашаюць. Прыйшоў час саступіць дарогу маладым».
За нацыянальную зборную Валянцін Бялькевіч правёў 56 матчаў, забіў 10 галоў.
Кацюгу дыскваліфікавалі
15 верасьня дысцыплінарная камісія Міжнароднага саюзу канькабежцаў распаўсюдзіла заяву: у допінг-пробе беларускі Анжалікі Кацюгі падчас фіналу Кубку сьвету ў галяндзкім Гэрэнвэне былі знойдзены забароненыя прэпараты — тэстастэрон і нарандрастэрон. Кацюга дыскваліфікавана на два гады: яна прапусьціць Зімовую алімпіяду ў Турыне і пазбаўлена залатога мэдаля, заваяванага на дыстанцыі 500 м на Кубку сьвету па канькабежным спорце. Спартоўка абскардзіла вэрдыкт.
«Тарпэда-СКА»: вяртаньне
Менскі футбольны клюб «Тарпэда-СКА» датэрмінова, за пяць тураў да фінішу, заваяваў пуцёўку ў першую лігу беларускага чэмпіянату. У мінулыя выхадныя «аўтазаводцы» перамаглі ў гасьцях «Палесьсе» з Мазырскага раёну. Яшчэ летась «Тарпэда» гуляла ў вышэйшай лізе айчыннага чэмпіянату, але празь юрыдычныя і фінансавыя цяжкасьці мусіла пачаць сэзон у другой лізе.
Скураны мяч
Каманда са Стоўпцаў перамагла на агульнанацыянальных спаборніцтвах сярод дзяцей і падлеткаў «Скураны мяч». Фінальныя спаборніцтвы праходзілі ў Воршы, на гарадзкім стадыёне. Другое месца заняла каманда «Прынёманскі», трэцяе — «Крышталь» (Менск). Спаборніцтвы «Скураны мяч» нарадзіліся ў СССР 40 гадоў таму і карысталіся шалёнай папулярнасьцю.
АР; football.by, pressball.by.
