Тры мэдалі
Беларускія спартоўцы вярнуліся з чэмпіянату сьвету па грэка-рымскай барацьбе, што прайшоў у Будапэшце, з трыма мэдалямі. Золата заваяваў Алім Сялімаў (вагавая катэгорыя 84 кг), дзьве «бронзы» — Сяргей Арцюхін (120 кг) і Вольга Хілько (63 кг).
Сярод пяскоў эгіпецкай зямлі
Беларуская каманда заняла 12-е месца на V этапе Кубку сьвету па ралі-рэйдах у Каіры — «Ралі фараонаў». З 37 экіпажаў дыстанцыю (2,3 тыс. км) пераадолелі толькі 23, астатнія незваротна згінулі ў пясках. Перамогу сьвяткаваў сумесны француска-бэльгійскі экіпаж, вугорцы — другія.
Цяпер у плянах беларусаў — удзел у сусьветным ралі Парыж—Дакар, што стартуе 31 сьнежня.
Хварэем за беларусаў
4 кастрычніка прайшло лёсаваньне групавога турніру Кубку УЭФА. Найцікавейшай выглядае група «С», дзе поруч з бэрлінскай «Гертай» і францускім «Лянсам» згуляюць генуэская «Сампдорыя» з нашым форвардам Віталём Кутузавым, бухарэсцкая «Сьцяўа» галкіпэра зборнай Васіля Хамутоўскага, швэдзкі «Хальмстад» паўабаронцы Дзяніса Сашчэкі.
Маскоўскі «Лякаматыў», колеры якога абараняюць Сяргей Гурэнка і Сяргей Амельянчук, у групе «В» пазмагаецца з каталюнскім «Эспаньёлам», сыцылійскім «Палерма», дацкім «Брондбю» і «Макабі» з Пэтах-Ціквы (Ізраіль).
«Дынама» (Бухарэст) галкіпэра Ўладзімера Гаева ўтварыў квінтэт «F» разам з «Марсэлем», «Хэрэнвэнам», баўгарскім «Леўскім» і ўладальнікам Кубку УЭФА-2005 маскоўскім ЦСКА.
І нарэшце, «Дняпро» (Днепрапятроўск), у якім не апошнюю скрыпку грае форвард моладзевай зборнай Сяргей Карніленка, будзе гуляць у групе «D» зь нідэрляндзкім «АЗ», ангельскім «Мідлсбро», швайцарскім «Грасхопэрам» і баўгарскім «Літэксам».
Ня наш дзень
Юнацкая футбольная зборная Беларусі (U-17) ня трапіла ў наступны этап адбору да чэмпіянату Эўропы. Беларусы абышлі славенцаў, але саступілі Галяндыі і Даніі.
АР, belta.by, gazeta.pl
