Фота Андрэя Лянкевіча
У аўторак увечары стала вядома, што Аляксандар Казулін разрывае адносіны з Аляксандрам Мілінкевічам. Яны не сышліся ў поглядах на будучыню намётавага гарадка. Казулін прапануе зьняцца і сабрацца ізноў 25 сакавіка. «Гэта выбар моладзі — стаяць да канца. І я буду зь імі», — кажа Мілінкевіч. Чаго болей у супрацы палітыкаў — плюсоў ці мінусаў?
Алесь Анціпенка, філёзаф, культуроляг:
У гэтым супрацоўніцтве было мала пазытыўнага. Я не прыхільнік сп.Казуліна і на яго кампанію глядзеў зь вялікім скепсісам.
Віктар Карняенка, намесьнік кіраўніка штабу А.Мілінкевіча:
Для Казуліна было болей плюсоў, для Мілінкевіча — мінусаў. Казулін не пасьпеў стаць папулярным палітыкам і падчас кампаніі пачаў выкарыстоўваць аўтарытэт Мілінкевіча. Фактычна, ён проста заскочыў у апошні вагон цягніка, які ад яго сыходзіў.
Анатоль Сідарэвіч, гісторык:
Колькі сябе памятаю ў палітычнай сыстэме Беларусі, столькі сацыял-дэмакраты былі непажаданай партыяй і для БНФ, і для АГП. Сацыял-дэмакраты іх цешаць толькі слабыя, калі кладуцца пад іх. Таму тут ніякага плюсу быць ня можа.
Анатоль Шумчанка, прадпрымальнік:
Плюсоў я ня бачу, толькі адзін мінус, і пры гэтым вялікі. Я схіляюся перад мужнасьцю гэтых людзей, якія кінулі выклік уладам, але яны не атрымалі галоўнага для палітыка – выніку. Чаго дамагліся? Мілінкевіч і Казулін правялі палітычную піяр-кампанію, людзі іх пазнаюць. Але што далей? 19-га прыйшлі на плошчу, пастаялі — а зранку ўсе пайшлі на працу. І адзін, і другі кандыдат згулялі па правілах Лукашэнкі.
Міхал Пліска, юрыст, палітоляг:
Лепш, канечне, было б, каб быў адзін кандыдат ад апазыцыі. Але ў тых умовах, у якіх праводзілася перадвыбарчая кампанія, прысутнасьць другога кандыдата ня моцна нашкодзіла. Мінус, што няма дамоўленасьці пра адзіны падыход да далейшага супраціву на плошчы.
