У расіяніна на мяжы канфіскавалі гадзіннік ад атамнай лодкі 1

Незвычайны груз з перавышэннем радыяцыйнага фону быў выяўлены 6 снежня на беларуска-ўкраінскай мяжы.

Як паведамілі ў прэс-цэнтры Дзяржаўнага пагранічнага камітэта Беларусі, грамадзянін Расіі ўязджаў у краіну на сваёй «Аўдзі» праз пункт пропуску «Новая Гута». Пры правядзенні ўсіх відаў кантролю пагранічны нарад зафіксаваў значнае перавышэнне дапушчальнага ўзроўню радыяцыі 11,6 мкЗв/гадз — пры дапушчальнай норме 1 мкЗв/гадз.

Іншамарка была неадкладна абследаваная спецыяльнымі прыборамі дазіметрычнага кантролю, вымярэнні паказалі, што крыніца выпраменьвання знаходзіцца ў багажніку аўтамашыны. Група спецыялістаў радыеметрычнай лабараторыі Гомельскай пагранічнай групы, якая прыбыла на месца, выявіла, што «фаніць» механізм гадзінніка. Такое перавышэнне даў радый-226, які знаходзіўся ў корпусе.

Паводле слоў уладальніка прадмета, яны з маці вярталіся з Хмяльніцкага дамоў у Пскоў. Ва Украіне яны гасцявалі ў сваяка — ваеннага пенсіянера. Той і паднёс ім такі падарунак, не падазраючы пра яго небяспечнае начынне.

Паводле меркавання экспертаў, такі механізм устанаўліваецца на падводных лодках і караблях з ядзернай сілавой устаноўкай. Ён не ўяўляе пагрозы жыццю і здароўю людзей, пакуль знаходзіцца на адлегласці больш за метр і яго герметычнасць не парушаная.

Прыбор перададзены ў Гомельскую мытню.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ