11 ліпеня ў судзе Ленінскага раёна Мінска павінен быў быць вынесены прысуд К.Лукашову - брату грамадскага дзеяча Вячаслава Сіўчыка. На сённяшнім пасяджэнні пракурор папрасіў аднавіць судовае следства ў сувязі з неабходнасцю допыту яшчэ аднаго сведкі - начальніка міліцыі грамадскай бяспекі Цэнтральнага раёна сталіцы Грыба. Нібыта пацярпелы міліцыянер Анатоль Сушчэня падчас здарэння тэлефанаваў свайму начальніку - Грыбу.
Абарона К.Лукашова была супраць хадайніцтва пракурора, таму што Грыб на момант нібыта ўчыненага злачынства не меў ніякага дачынення ні да пацярпелага Сушчэні, ні да Лукашова і не з'яўляўся начальнікам міліцыі грамадскай бяспекі Цэнтральнага раёна. К.Лукашоў таксама заявіў, што яму ставіцца ў віну наезд на супрацоўніка міліцыі, а тэлефанаванні не могуць служыць сведчаннем гэтай падзеі.
Суд задаволіў хадайніцтва дзяржаўнага абвінаваўцы і пастанавіў дапытаць у якасці сведкі Грыба.
"Гэта зацягванне працэсу. Абсалютна зразумела, што сведка з боку пракуратуры не можа паказаць нічога па сутнасці справы. Тым не менш суд вынес рашэнне задаволіць хадайніцтва пракурора", - зазначыў В.Сіўчык.
Нягледзячы на хадайніцтва пракурора, Грыб на працэс не з'явіўся. У сувязі з гэтым суддзя Таццяна Жулкоўская перанесла заканчэнне працэсу на 25 ліпеня гэтага года.
Ва УУС Цэнтральнага раёна Мінска БелаПАН паведамілі, што супрацоўніка з прозвішчам Грыб у іх няма, і параілі звярнуцца ва УУС Мінскага раёна. Ва УУС Мінскага раёна паведамілі, што ў іх працуе Міхаіл Грыб.
К.Лукашоў, нагадаем, быў затрыманы 19 снежня 2006 года. Яму інкрымінавалі наезд на аўтамабілі на супрацоўніка міліцыі 29 сакавіка 2006 года, калі ён забіраў В.Сіўчыка з аддзялення хірургіі 3-й клінічнай бальніцы Мінска. У той дзень невядомыя з пасведчаннямі супрацоўнікаў МУС спрабавалі затрымаць Сіўчыка пасля яго выпіскі з бальніцы нібыта за дробнае хуліганства, аднак з дапамогай брата палітыку ўдалося схавацца.
20 лютага 2007 года К.Лукашоў быў прызнаны судом Ленінскага раёна сталіцы вінаватым ва ўчыненні злачынства, прадугледжанага арт. 364 Крымінальнага кодэкса (насілле ў дачыненні да супрацоўніка міліцыі пры выкананні ім службовых абавязкаў). Яго прыгаварылі да двух гадоў умоўнага зняволення з адтэрміноўкай выканання прысуду на два гады. Затым згодна з хадайніцтвам абароны справа была накіравана на паўторны разгляд.
