Упраўленне Следчага камітэта па Гомельскай вобласці раскрыла заказное забойства. Пасля пажару ў Гомелі 3 снежня па Ляшчынскім праездзе ў прыватным доме былі знойдзены трупы45-гадовага прадпрымальніка і яго старой маці. Высветлілася, што яны загінулі не падчас пажару, а былі забітыя.
Як паведаміў намеснік начальніка ўпраўлення следчага камітэта па Гомельскай вобласці Юрый Дзям’янчык, бізнесмен займаўся пракатам аўтамабіляў, у яго ўласнасці знаходзілася шэсць дарагіх іншамарак. Мужчына быў у разводзе з жонкай і жыў разам з маці.
А20-гадовы беспрацоўны сын камерсанта часова пражываў у Бранскай вобласці Расіі, часта бываў у Гомелі. Малады чалавек быў дыджэем і ладзіў вечарынкі, у тым ліку ў гомельскіх клубах.
Хлопец канфліктаваў з бацькам
У адну з начэй у канцы лістапада прыяцель дыджэя пракраўся ў дом бізнесмена, адчыніўшы дзверы ключамі яго сына.
Прадпрымальнік прачнуўся і спрабаваў змагацца з забойцам, але пры дапамозе малатка і іншых сродкаў малады чалавек забіў мужчыну і яго маці.Трупы схаваў у багажніку аўтамабіля, які стаяў у двары дома.
Сваякоў у сям’і ў Гомелі не было, таму гібель бізнесмена і яго маці ніхто не заўважыў.
На працягу некалькіх дзён выканаўца забойства заходзіў у дом да сваіх ахвяр і краў іх рэчы.Праз дзесяць дзён пасля забойства перанёс трупы назад у дом і падпаліў яго, спрабуючы інсцэніраваць пажар.
Першым супрацоўнікі праваахоўных органаў затрымалі замоўцу забойства, а пасля і выканаўцу, які ўжо прызнаўся ва ўчыненым. Сын жа прадпрымальніка пакуль не прызнае сваю віну. Тым не менш ён праходзіць па справе як саўдзельнік забойства. Следства працягваецца.
