Прэм'ер-міністр Беларусі Міхаіл Мясніковіч 17 студзеня заслухаў справаздачы кіраўнікоў міністэрстваў архітэктуры і будаўніцтва, жыллёва-камунальнай гаспадаркі, транспарту і камунікацый, а таксама сувязі і інфарматызацыі пра вынікі працы ў 2012 годзе і планы па выкананні задач на 2013 год.
Як паведаміла прэс-служба ўрада, кіраўнік Мінбудархітэктуры Анатоль Нічкасаў звярнуў увагу на тое, што рашэнні, выпрацаваныя Саўмінам па рэалізацыі канцэпцыі жыллёвай палітыкі, падрыхтаваны і знаходзяцца на ўзгадненні ў Нацбанку і Мінфіне. Найбліжэйшым часам павінна завяршыцца праца па падрыхтоўцы нарматыўнай базы, якая прадугледжвае ўвядзенне інстытута дзяржаўнай замовы на будаўніцтва жылля з пашырэннем нарматыўнага рэгулявання долевага будаўніцтва, а таксама новыя падыходы да рэалізацыі канцэпцыі стварэння гарадоў-спадарожнікаў. Сёлета плануецца ўвесці ў эксплуатацыю 6,5 млн. кв. м жылля, у тым ліку 2,5 млн. кв. м — для грамадзян, якія знаходзяцца на ўліку для паляпшэння жыллёвых умоў.
Прадугледжана рэалізацыя шэрагу інвестыцыйных і інавацыйных праектаў, арыентаваных на апераджальнае развіццё вытворчасцяў з малой энерга- і матэрыялаёмістасцю, а таксама на пашырэнне сферы паслуг.Сёлета плануецца завяршыць два буйныя інвестпраекты — на ААТ "Крычаўцэменташыфер" і ААТ "Гомельшкло", а таксама пяць інвестпраектаў па мадэрнізацыі домабудаўнічых камбінатаў і заводаў буйнапанэльнага домабудавання.
Мясніковіч даручыў міністэрству эфектыўна арганізаваць працу па ўзвядзенні ў краіне арэнднага жылля.У адпаведнасці з даручэннем кіраўніка дзяржавы павінны быць рэалізаваны праекты па ўзвядзенні такога жылля для вучоных. Напрыклад, у Мінску плануецца пабудаваць для іх два арэндныя дамы — 500 кватэр.
Акрамя гэтага, прэм'ер запатрабаваў, каб усе арганізацыі, якія ажыццяўляюць будаўніча-мантажныя работы, вытворчасць праектных работ, будаўнічых матэрыялаў і канструкцый, былі рэзідэнтамі Беларусі.Гэта ж тычыцца арганізацый транспарту, сувязі і іншых галін. Мінбудархітэктуры, аблвыканкамам і Мінгарвыканкаму сумесна з МЗС і зацікаўленымі ведамствамі даручана вырашыць гэтае пытанне. "Шмат арганізацый, якія не з'яўляюцца рэзідэнтамі Беларусі, аказваюць у краіне свае паслугі. Яны не плацяць у рэспубліцы падаткі, не ідуць адлічэнні ў Фонд сацыяльнай абароны насельніцтва. Гэтыя паслугі не ўлічваюцца ў ВУП краіны", — гаворыцца ў паведамленні прэс-службы Саўміна.
На працягу месяца Мінбудархітэктуры неабходна ўдакладніць планы па прыцягненні прамых замежных інвестыцый і ўзвядзенні інвестыцыйных аб'ектаў.
Міністр ЖКГ Андрэй Шчорац праінфармаваў аб планах развіцця галіны, спыніўся на пытаннях тарыфнай палітыкі на паслугі ведамства для насельніцтва.
Трымаў справаздачу перад урадам і міністр транспарту і камунікацый Анатоль Сівак. У сваім выступленні ён паведаміў пра планы мадэрнізацыі падпарадкаваных міністэрству арганізацый, вызначаныя на гэты год інвестыцыйныя праекты, работы па прыцягненні прамых замежных інвестыцый на чыстай аснове. Прэм'ер даручыў вызначыць падыходы, аб'ёмы і крыніцы фінансавання рэканструкцыі аб'ектаў нацыянальнага аэрапорта Мінск з улікам правядзення ў Беларусі ў 2014 годзе чэмпіянату свету па хакеі.
Мясніковіч заслухаў таксама справаздачу міністра сувязі і інфарматызацыі Мікалая Панцялея. Апошні паведаміў аб запланаванай у 2013 годзе інавацыйнай і інвестыцыйнай дзейнасці, укараненні сучасных інфармацыйна-камунікацыйных тэхналогій, а таксама мадэрнізацыі профільных вытворчасцяў. Мясніковіч запатрабаваў ад міністэрства больш эфектыўнай працы, новых ініцыятыў і падыходаў да аказання паслуг і рэалізацыі інавацыйных праектаў. Прэм'ер паводле прапановы Мінэканомікі даручыў таксама прапрацаваць пытанне аб магчымасці правядзення больш гнуткай палітыкі ў дачыненні да ўваходных таксаў на міжнародныя тэлефанаванні.
