Паўстанец 1863 года Чэрскі: знакаміты географ, імем якога назвалі хрыбет у Сібіры 6

Камень Чэрскага.

Ян (Іван) Чэрскі — беларускі паўстанец. Пасля высылкі ў Сібір вымушана стаў расійскім географам і геолагам. ягоным імем названы вялізны хрыбет у Паўночна-Усходняй Сібіры.

Гэтымі днямі спаўняецца 150 гадоў з пачатку Паўстання 1863 года. Менавіта ў выніку яго у Іркуцк быў сасланы беларус Ян Чэрскі, які з цягам часу стаўся знакамітым геолагам і географам, што надрукаваў больш за 90 навуковых прац, прысвечаных Байкалу й наваколлю. У выніку імем Чэрскага названы горны хрыбет — гіганцкі, памерам з Беларусь.

Гэтае Паўстанне іншым часам памылкова называюць Польскім. Адсюль усіх удзельнікаў — палякамі.

На самай справе галоўныя баі з царскімі войскамі вяліся якраз у Беларусі. Менавіта тады Кастусь Каліноўскі пачаў выдаваць першую ў гісторыі беларускамоўную газету «Мужыцкая праўда».

Беларусы Іркуцкай вобласці 150-ю гадавіну Паўстання 1863 года адзначаць у Іркуцку — 26 студзеня. Арганізатар сустрэчы — регіянальнае грамадскае аб’яднанне «Іркуцкае таварыства Беларускай культуры імя Яна Чэрскага». На Круглы стол беларусы збяруць таксама іркуцкіх палякаў, літоўцаў, украінцаў, чыноўнікаў, грамадскасць гэтай вобласці Сібіры. Круглы стал збярэцца 26 студзеня, а 16.00 у Гандлёвым цэнтры «Пассаж» на адрасе вуліцы Літвінава, 16, кабінет 301. Назва Круглага стала — «Паўстанне 1863 года: факты і каментары». Уваход вольны.

Кантакт: Алег Рудакоў, тэл. 8-902-17-068-30.

Алег Рудакоў

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ