Лідары найбуйнейшых прафсаюзных аб'яднанняў Расіі і Беларусі падпісалі зварот да кіраўнікоў дзвюх дзяржаў Уладзіміра Пуціна і Аляксандра Лукашэнкі. Ліст тычыцца падпісанага Лукашэнкам у снежні мінулага года дэкрэта №9 "Аб дадатковых мерах па развіцці дрэваапрацоўчай прамысловасці",які фактычна забараняе звальненне па ўласным жаданні па ініцыятыве работнікаў.
Як адзначаецца ў прафсаюзным звароце, у адпаведнасці з гэтым дэкрэтам «адмяняецца права работнікаў галіны на звальненне, што фактычна ўводзіць у адной з частак Саюзнай дзяржавы прымусовую працу».
Зварот да кіраўнікоў Расіі і Беларусі падпісалі прэзідэнт Канфедэрацыі працы Расіі Барыс Краўчанка, старшыня Федэрацыі незалежных прафсаюзаў Расіі Міхаіл Шмакаў і старшыня Беларускага кангрэсу дэмакратычных прафсаюзаў Аляксандр Ярашук. Прафсаюзныя лідэры дзвюх дзяржаў нагадваюць, што з дапамогай прымусу работнікаў «немагчыма вырашыць праблему павышэння эфектыўнасці і прадукцыйнасці працы, хутчэй наадварот - можна атрымаць прама супрацьлеглы вынік».
«Упэўненыя, што шляхі вырашэння праблемы ляжаць зусім у іншай плоскасці, - адзначаецца ў звароце прафсаюзных лідэраў Расіі і Беларусі.- На наш погляд, у свеце не існуе іншага сродку павышэння адказнасці работнікаў, чым эканамічная зацікаўленасць, стымуляванне працаваць эфектыўна і высокапрадукцыйныя. Пры гэтым павінна няўхільна забяспечвацца выкананне Канстытуцыі і нацыянальных законаў аб працы, Канвенцый Міжнароднай арганізацыі працы».
«Такі падыход з'яўляецца адзіна правільным, разумным і апраўданым як з сацыяльна-эканамічнай, так і з маральнага пункту гледжання, паколькі фармуе ў працоўнага чалавека пачуццё ўласнай годнасці і самапавагі, а таксама павагі да вынікаў сваёй працы», - падкрэсліваецца ў тэксце звароту. У сувязі з гэтым у адрас прэзідэнтаў Расіі і Беларусі гучыць заклік ацаніць наступствы рэалізацыі Дэкрэта № 9 для працоўных і грамадскасці абодвух краін.
«Такі крок, несумненна, будзе толькі спрыяць працэсам інтэграцыі, развіцця і росквіту Расіі і Беларусі, дасягненні высакароднай задачы - забеспячэння годнага жыцця народаў нашых брацкіх краін", - гаворыцца ў тэксце звароту.На думку прафсаюзных лідараў, адмена гэтага дэкрэта не толькі дазволіць ліквідаваць небяспечны прэцэдэнт працоўных адносін, заснаваных на прымусе, але і дасць магчымасць у далейшым фармаваць заканадаўчую базу ў Расіі і Беларусі на аснове строгага захавання правоў і інтарэсаў работнікаў наёмнай працы.
