Дзёрзкі напад на расійскага дальнабойшчыка, які ехаў на птушкафабрыку ў Баранавіцкі раён, быў здзейснены днём 14 лютага. Калі кіроўца фуры спыніўся на стаянцы, каб агледзець кузаў аўтамабіля, яго ўдарылі ззаду па галаве, і ён згубіў прытомнасць.
Антон Галюкевіч.
«Калі я ачнуўся ў кузаве рэфрыжэратара, у мяне была паніка. Дзверы былі зачыненыя, поўная цемра. Я з Расіі і ведаю, што, калі цябе зачынілі ў рэфрыжэратары, гэта ўсё, цябе ўжо няма ў жывых»,— згадвае свае адчуванні Антон Галюкевіч.
Антон дабраўся да вузкага акенца для праветрывання ў дзвярах рэфрыжэратара, разагнуў наколькі гэта было магчыма металічныя краты і стаў клікаць на дапамогу, але беспаспяхова.
Хвілін праз дваццаць палонны адчуў, што машына кранулася. Ад’язджаючы, Антон праз акенца заўважыў на стаянцы чырвоны мікрааўтобус.Мяркуючы, што менавіта на гэтай машыне мог прыехаць злачынец, палонны ўласнай крывёю запісаў нумар мікрааўтобуса на сцяне рэфрыжэратара (калі разгінаў краты на акенцы, ён моцна параніў рукі, яны ўсе былі ў крыві).
Антон разумеў: нават калі злачынец проста пакіне яго зачыненым у кузаве (а яго кіроўца фуры якраз перад загрузкай астудзіў), доўга ён там не высядзіць.Таму прыдумаў спосаб прыцягнуць да сябе ўвагу кіроўцаў: ён стаў здымаць з сябе вопратку — майку, шкарпэткі — і кідаць праз шчыліну ў акенцы на дарогу.
«Але машыны праязджалі, быццам нічога не заўважаючы.Потым фура спынілася, загучала музыка, а шум, які даносіўся з кабіны, спыніўся», — распавёў Антон.
Кіроўца зразумеў — зламыснік сышоў, кінуўшы фуру прама на дарозе, відавочна усведамляючы, што будзе з зачыненым у халадзільніку кіроўцам.
Выратаваць чалавека, кінутага ў кузаве грузавіка, зімой, удалечыні ад населеных пунктаў і людзей, мог толькі цуд. І ён адбыўся — хвілін праз 15 пасля таго, як фура спынілася, міма праходзіў рыбак.Антон убачыў яго ў акенца і пачаў клікаць на дапамогу. Пажылы мужчына пачуў крыкі, адкрыў кузаў і выпусціў Антона. Па словах кіроўцы, яго выратавальнік, відавочна, спалохаўся не менш, чым ён сам. І паспяшаўся збегчы, як толькі палонны выбраўся з кузава.
«Калі я выйшаў адтуль, столькі шчасця было, быццам я другі раз нарадзіўся», — прызнаўся выратаваны кіроўца.
Тут жа патэлефанавалі ў міліцыю, супрацоўнікі ДАІ прыехалі літаральна праз некалькі хвілін. Антон прадыктаваў ім нумар мікрааўтобуса, які ён бачыў на прыпынку. Як высветлілася пазней, менавіта на гэтым бусе і прыехаў зламыснік.
Па словах Антона Галюкевіча, ён і падумаць не мог, што ў нашай краіне на яго вось так, сярод белага дня, могуць напасці.А яшчэ прызнаўся, што быў прыемна здзіўлены працай беларускай міліцыі: «Шчыра кажучы, я быў прыемна шакаваны працай беларускай міліцыі. Так аператыўна прыехалі, хутка злавілі злачынцу. І стаўленне было вельмі добрае. У нас бы яны гадзін праз пяць, напэўна, толькі прыехалі на месца здарэння. А тут, вядома, хлопцы добра працуюць».
Цяпер Антон марыць хутчэй вярнуцца дадому. Ён кажа, што пасля ўсяго, што з ім здарылася, хутчэй за ўсё, у бліжэйшы час адмовіцца ад паездак і возьме адпачынак.І прызнаецца, што з жахам думае пра тое, што магло б адбыцца, калі б акенца было зачыненым ці рыбак не праходзіў міма: «На вуліцы тэмпература была 0 градусаў, у кузаве — градуса 2 марозу. А я ў лёгкай вопратцы. Вядома, калі б машына не прыйшла на загрузку, мяне сталі б шукаць. Але да таго часу невядома, што б са мной было. Мне вельмі пашанцавала. Вялікі дзякуй чалавеку, які пачуў мой крык аб дапамозе і выцягнуў мяне, і міліцыі, якая хутка спрацавала».
0
0
0
0
0
0
