Сервер знаходзіцца ў Амерыцы. З Беларусі ён быў недаступны.

У 18.30 сайт запрацаваў.

* * *

Сайт Беларускай хрысціянскай дэмакратыі (bchd.info) у панядзелак быў недаступны для карыстальнікаў у Беларусі.

«Сайт заблакаваны „Белтэлекамам“, нашы тэхнічныя спецыялісты гэта высвятлялі. Доступ закрыты менавіта для беларускіх карыстальнікаў, а на гэтыя дзеянні ў „Белтэлекама“ манаполія. Гэткім жа чынам сайт блакаваўся ў дзень парламенцкіх выбараў мінулага года. Але зайсці на сайт можна з-за мяжы ці праз проксі-серверы», — сказаў «БелаПАНу адказны сакратар БХД Дзяніс Садоўскі.

Фізічна сервер знаходзіцца ў ЗША. Але пінг да яго не праходзіць далей за «Белтэлекам».

Пры выкарыстанні ананімайзераў і проксі-сервер сайт убачыць можна. Даступны ён і з любой краіны свету, апроч Беларусі.

Дзяніс Садоўскі мяркуе, што блакаванне сайта звязана з правядзеннем акцыі «Хваля салідарнасці» ў падтрымку палітзняволеных, якая праходзіць у фармаце штодзённага марафону ў розных гарадах Беларусі з 13 лютага.

Аднак насамрэч сайт БХД не меў вялікага ўплыву ў інтэрнэце. Паводле звестак Акавіты, колькасць наведвальнікаў на ім у пікавыя дні ледзь-ледзь перавальвала за 250 чалавек. Сярэдняя ж колькасць карыстальнікаў — каля 150 чалавек.

Дагэтуль у Беларусі некаторыя сайты блакаваліся ў дзяржаўных установах: сярод іх былі «Хартыя-97», «Беларускі партызан», сайт праваабронцаў-вясноўцаў. Пад татальны бан раней падпадалі толькі некаторыя парнаграфічныя рэсурсы.

У прынцыпе, сайт мог трапіць пад блакаду і ў выніку тэхнічнай памылкі: калі ягоны адрас выпадкова супаў з адрасам нейкага забароненага рэсурсу.

Беларуская хрысціянская партыя гуртуе хрысціянскіх актывістаў розных вызнанняў. Партыя па сваіх поглядах блізкая да нямецкіх хадэкаў (партыя канцлеркі Ангелы Меркель). БХД таксама займае выразныя патрыятычныя пазіцыі. Лідар хадэкаў Павел Севярынец з’яўляецца палітычным зняволеным. Ён адбывае пакаранне на «хіміі» пад Пружанамі. Лукашэнкаўцы шмат разоў адмаўлялі партыі ў рэгістрацыі.

Працяг тэмы будзе.

ЯМ