Два месяцы таму расіяніна Георгія Саракашыша ў Мінску арыштаваў КДБ. Саракашыш працаваў дырэктарам санаторыя «Беларусь» у Сочы (належыць Кіраўніцтву справаў прэзідэнта Беларусі). У Камітэце не каментуюць гэтай справы, але СМІ стала вядома, што менавіта Саракашыша падазраюць у вялікіх крадзяжах пры будоўлі. У расійскім пасольстве паведамілі, што яму інкрымінуюць крадзеж шляхам злоўжывання службовымі паўнамоцтвамі ў буйным памеры. Пакуль
«НН» звязалася з братам арыштаванага расіяніна Хрыстафорам Саракашышам. Званок заспеў яго ў Маскве, куды ён прыехаў на пахаванне стрыечнага брата.
«НН»: Калі затрымалі Георгія?
ХС: 21 снежня яны выехалі ў Мінск на нараду ў Кіраўніцтва справаў прэзідэнта. Звычайна ездзяць планы вызначаць. Пасля гэтага мы даведаліся пра затрыманне.
Затрымалі спачатку на тры дні. Фірмы недавыканалі работ і нехта камусьці вінны. Гэта чыста гаспадарчая справа. Але затым працягнулі арышт на два месяцы, а цяпер яшчэ на два. Думаю, хочуць прад’явіць хабар. Ён там як у заложніках. Гэта зноў 1937 год? З розніцай, што цяпер толькі не расстрэльваюць…
Людзі працавалі сумленна. З будаўніцтвам яны ішлі наперад. Грошай, калі не было, фірмы працавалі за свае. Бо ведалі, што беларусы выплацяць.
«НН»: З кім паехаў Ваш брат у Мінск?
ХС: Са сваім намеснікам беларусам Кізімам і дырэктарам будаўнічага аб’екта, таксама расіянінам.
Беларусы два гады таму намеснікам прыслалі Кізіму, каб ён займаўся будоўляй. Маўляў, брату аднаму складана. Георгій не падпісваў рахункаў, пакуль намеснік не адобрыць і сам не падпіша. «Не хвалюйцеся, ваш дырэктар вернецца», — казалі супрацоўнікам санаторыя. Вярнуўся, толькі не той.
Я чакаў, што разбяруцца ды прабачацца. А тут дырэктара новага прызначылі.
«НН»: Да якіх фірм прэтэнзіі ў беларускага боку?
ХС: «Новы горад БКД» і «Карпарацыя ФБГ». Беларусы апелююць да таго, што яны не дабудавалі. «Беларусь» нібыта выставіла сумы шкоды 100 млн расійскіх рублёў (каля $3,3 млн) адной фірме і 50 млн другой. Беларускі бок сам правёў экспертызы і абвесціў, што не дабудавалі. А прапанову сумеснай экспертызы адмовіў. Разбярыцеся нарэшце, хто каму вінны!
Возьмуць закладнікаў, а пасля кажуць, што адпусцяць як толькі фірмы выплацяць грошы.
Гэтыя фірмы падалі ў суд на беларусаў, каб вярнуць свае грошы.
«НН»: Чаму вы так доўга не паведамлялі пра арышт брата?
ХС: Мы не падымаем вялікага шуму, бо спадзяемся на розум Аляксандра Лукашэнкі. Ваш прэзідэнт нармальна ставіўся да Георгія Канстанцінавіча. Брат аддаваўся таму, каб «Беларусь» квітнела. Нам кажуць: «Вы падазрона маўчыце. Нешта ў гэтым ёсць, калі маўчыце. Чаго вы чакаеце?»
Ідуць будоўлі. Бываюць нейкія прэтэнзіі, якія вырашаюцца шляхам перамоў. Вось яны і паехалі дамаўляцца. Але не паспелі зайсці, як іх арыштаваў КДБ. Людзі паехалі ў перадсвяточным настроі. І думкі не было, што могуць затрымаць. Іначай ці паехалі б?
***
Хто каму вінны?
Фірма «Новы горад БКД» і «ФБГ Карпарацыя» пачалі судзіцца з санаторыем «Беларусь».
Арбітражны суд Краснадарскага края разглядае дзве справы фірмы «Новы горад» па спагнанні з санаторыя 207 мільёнаў 712 тысяч расійскіх рублёў (каля $6,7 мільёнаў) і 58 мільёнаў 64 тысяч (каля $1,9).
«ФСГ Карпарацыя» патрабуе значна меншую суму — 905 150 расійскіх рублёў (каля $30 тысяч).
Гэта пытанні запазычанасці санаторыя перад забудоўшчыкамі.