04.03.2013 / 00:58

Нацыянальныя сімвалы — у кожны дом

Гомельскія актывісты грамадскай ініцыятывы «Хопіць піць — трэба жыць» распачалі кампанію распаўсюду беларускіх гістарычных сімвалаў.

Гомельскі актывіст Кастусь Жукоўскі кажа, што нават моладзь не заўсёды адкажа, што вершнік на кані — гэта беларускі гістарычны герб «Пагоня», які ў пачатку 90-х выкарыстоўваўся як афіцыйны герб незалежнай Беларусі.

Гэты герб і бел-чырвона-белы сцяг былі скасаваныя ўладамі пасля рэферэндуму 1995 года.

Жукоўскі: «Супольнымі намаганнямі мы вырабілі больш за тысячу шэўронаў, а таксама сотню белых кубкаў і саколак з выявай Пагоні. Замовілі й надрукавалі шмат перакідных календароў з партрэтамі нацыянальных герояў Беларусі пад агульнай назвай «Выбітныя дзеячы зямлі беларускай».

Паводле словаў Жукоўскага, некаторыя рэчы з нацыянальнымі сімваламі яны раздалі мінакам. А вось кубкі з Пагоняй, календары й шэўроны падрыхтаваныя ў якасці прызоў за допісы на сайт грамадскай ініцыятывы spasemstranu.com. Даслаў на гэты сайт нататку на значную сацыяльную тэму — атрымаў прыз з нацыянальнымі сімваламі.

Лідар ініцыятывы «Хопіць піць — трэба жыць» — Зміцер Карашкоў. Аўтары ідэі календароў — Павал Грабавец і Алег Боклаг.