07.03.2013 / 13:59

ЗВР Беларусі мінімальна скарачаюцца трэці месяц запар

Як паведамляе ўпраўленне інфармацыі Нацыянальнага банка, па выніках лютага золатавалютныя рэзервы па методыцы вызначэння МВФ скараціліся на 12,8 млн. долараў ЗША і, паводле папярэдніх даных, на 1 сакавіка 2013 года склалі 8 млрд. 11,8 млн. долараў у эквіваленце.

Паводле даных Нацбанка, скарачэнне аб’ёму золатавалютных рэзерваў галоўным чынам абумоўлена пагашэннем знешніх і ўнутраных абавязацельстваў у замежнай валюце Нацыянальным банкам і ўрадам Беларусі, якія ў лютым гэтага года былі выкананыя ў поўным аб’ёме, а таксама зніжэннем цэн на золата на міжнародным рынку каштоўных металаў.

Падтрыманню аб’ёму золатавалютных рэзерваў спрыяла станоўчае сальда куплі-продажу Нацыянальным банкам замежнай валюты на Беларускай валютна-фондавай біржы.

Тым часам у нацыянальным вызначэнні Нацбанка ўзровень золатавалютных рэзерваў Беларусі ў лютым павялічыўся на 236,1 млн. долараў ЗША і на 1 сакавіка 2013 года склаў 9.181,6 млн. долараў.

Ад нацыянальнай методыкі вызначэння рэзерваў методыка вылічэння МВФ адрозніваецца тым, што пры падліку ЗВР улічваюцца толькі манетарнае золата і валютныя рэзервы ў свабодна канвертаваных валютах замежных дзяржаў.