Няветлівая кандуктарка: «Са мной трэба размаўляць па-руску» 150

З абуральным выпадкам сутыкнуўся мінчук Андрусь Крэчка.

«1 красавіка я ехаў у тралейбусе маршрута № 1.

Я спытаў у кандуктаркі па-беларуску, ці будзе ў яе рэшта са ста тысячаў. Яна груба адказала: „Са мной трэба размаўляць па-руску. Не ганьбі сябе са сваёй беларускай“.

Кандуктарку завуць Дар’я Малашковіч, і калі я пачаў запісваць яе прозвішча для скаргі, яна пачала хапаць маю асадку, здзекліва казала „даць табе аўтограф?“, краналася маёй шчакі», — расказаў «Нашай Ніве» Крэчка.

Паводле яго словаў, гэта першы падобны выпадак, з якім яму давялося сутыкнуцца.

«Я раней сустракаў расіян, якія ветліва прасілі размаўляць па-руску, бо не разумеюць беларускай. Але такое варожае стаўленне сустракаю ўпершыню», —

сказаў ён.

Крэчка ўжо падрыхтаваў скаргу ў Мінсктранс, але пакуль не дасылаў яе. «Я не ведаю, ці напісаць толькі пра гэты выпадак, ці далучыць да скаргі артыкулы з Канстытуцыі і з Закона аб мовах», — паведаміў Андрусь Крэчка.

«НН» звязалася з кіраўніком аддзела перавозак тралейбуснага парка № 5 Сяргеем Шукам. Ён параіў даслаць скаргу.

«Няхай пацярпелы звяртаецца ў парк са скаргай. Тады будзем разбірацца, выклікаць яго, выклікаць кандуктарку. Бо пасажыр у скарзе можа напісаць адно, а кандуктар — абсалютна супрацьлеглае», —

сказаў Шука.

На пытанне, ці праходзяць кандыдаты на вакансію кантралёра-кандуктара адмысловыя тэсты, Шука адказаў, што спецыялізаванай праверкі на прафпрыдатнасць для кандуктараў не існуе, але яны павінны дзейнічаць паводле службовай інструкцыі, якая, у тым ліку, патрабуе ад кандуктара ветлівага і паважлівага стаўлення.

Яўген Крэйда

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ