Фенаменальная кампанія: Капрылес практычна зраўняў шанцы на перамогу з Мадура 26

Энрыке Капрылес падхапіў папулісцкі стыль Чавэса. Ён носіць не пінжакі, а футболкі папулярных клубаў... Фота «Эль Насьяналь».

...актыўна жэстыкулюе... Фота «Эль Дыярыа».

...Сабраў на мітынг у Каракасе сотні тысяч прыхільнікаў... Фота «Гардыян».

...Сарваў голас. Фота Асашыэйтэд прэс.

...Кампанія праходзіць мірна, ніхто не арыштоўвае апазіцыянераў. Фота «Дэйлі тэлеграф».

Сацыялагічнае даследаванне, праведзенае расійскай сацыялагічнай службай ВЦІОМ, фондам «Vox populi» і кампаніяй «PalitrumLab», пацвердзіла звесткі венесуэльскіх сацыёлагаў. Рэйтынг пераемніка Чавэса Нікаласа Мадура падае. Папулярнасць адзінага кандыдата ад апазіцыі Энрыке Капрылеса ўвесь час расце.

Па-першае, Капрылес выкладаецца ў часе перадвыбарчай кампаніі на 150%, аб’язджае горад за горадам і агрэсіўна адказвае на кожны выпад Мадура.

Па-другое, сам Мадура нярэдка кажа абы-што. У яго няма Чавэсавага ўнікальнага таленту прамоўцы.

Капрылес сарваў голас ад выступаў. Мадура дагаварыўся да таго, што стаў расказваць, нібы яму было яўленне Чавэса ў выглядзе птушкі.

Калі месяц таму разрыў папулярнасці між Мадура і Капрылесам складаў каля 15%, то на сёння ён скараціўся да 2%.

Расійскія сацыёлагі прызнаюць, што перамога можа залежаць ад падзей апошніх дзён і ў кожным разе кандыдатаў будуць раздзяляць лічаныя працэнты.

У выпадку перамогі Капрылеса можна чакаць згортвання беларуска-венесуэльскіх супольных праектаў, за якімі нярэдка стаялі ідэалагічныя, а не эканамічныя матывацыі.

Выбары ў Венесуэле адбудуцца 14 красавіка, у нядзелю. Сістэма галасавання ў Венесуэле электронная.

Мікола Бугай

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ