Як паведамілі карэспандэнту БЕЛТА у аддзеле дзяржкантролю за выкарыстаннем і аховай расліннага свету, лясоў і ландшафтаў Мінпрыроды,
- у Гомельскай вобласці збор брусніц пачынаецца 20 жніўня, журавін — 5 верасня;
- у Віцебскай — 18 жніўня і 1 верасня адпаведна;
- у Гродзенскай — 15 жніўня і 15 верасня адпаведна;
- у Мінскай — 18 жніўня і 8 верасня адпаведна;
- у Брэсцкай — журавін — 5 верасня;
- у Магілёўскай — журавін — 25 жніўня. «
У гэтым годзе ў большасці абласцей збор ягад пачынаецца раней за звычайны тэрмін, — адзначылі спецыялісты. — Так, у Брэсцкай і Магілёўскай абласцях пачалі ўжо збор брусніц».
У аддзеле дзяржкантролю за выкарыстаннем і аховай расліннага свету, лясоў і ландшафтаў Мінпрыроды таксама сказалі, што кожны аблвыканкам у залежнасці ад кліматычных умоў у сваёй вобласці самастойна ўстанаўлівае тэрміны збору брусніц і журавін. У некаторых раёнах мясцовымі выканкамамі могуць таксама быць прыняты рашэнні аб устанаўленні больш позніх тэрмінаў збору.
У адпаведнасці з Кодэксам Рэспублікі Беларусь аб адміністрацыйных правапарушэннях ягаднае браканьерства — невыкананне ўстаноўленых тэрмінаў збору дзікарослых пладоў і ягад, прымяненне забароненых для гэтага метадаў — караецца штрафам. Яго велічыня для грамадзян складае да 20 базавых велічынь, для індывідуальных прадпрымальнікаў — да 100 базавых велічынь. «Рана сабраныя брусніцы і журавіны страчваюць свае карысныя ўласцівасці, таму збор неабходна праводзіць своечасова», — дадалі субяседнікі.
Ягады журавін маюць арганічныя кіслоты, пекцінавыя рэчывы, аскарбінавую кіслату, карацін, амінакіслоты, руцін, гліказід вакцынін, а таксама цэлы шэраг мікраэлементаў — ёд, жалеза, медзь, марганец. Журавіны выкарыстоўваюць як гарачкапаніжальны сродак пры розных прастудных захворваннях, а таксама гіпа‑ і авітамінозах. Акрамя таго, журавіны дапамагаюць пры хранічных гастрытах.
Брусніцы рэкамендуюць выкарыстоўваць пры захворваннях нырак, дыябеце, рэўматызме. Бруснічны сіроп абвастрае зрок. Сок брусніц рэкамендуюць піць пры павышаным артэрыяльным ціску, неўрозах і анеміі ў цяжарных. ‑0‑
