Як паведамілі ў кампаніі, з 16 мая «БелСел» прыпыніць аказанне паслуг сувязі ў Гомелі, Магілёве, Віцебску, Гродне, Мар’інай Горцы, Рэчыцы, Оршы, Жлобіне і Бабруйску «ў сувязі з мадэрнізацыяй сеткі». Кампанія выказвае прабачэнні і плануе паведаміць аб аднаўленні абслугоўвання дадаткова.
У кампаніі таксама праінфармавалі аб змене кіраўніка — выканаўцам абавязкаў дырэктара ТАА СП «БелСел» прызначаны Сяргей Шынкароў.
Раней мабільны аператар паведамляў аб планах запусціць у 2013 годзе ў камерцыйную эксплуатацыю сетку новага пакалення LTE (4G).
ТАА СП «БелСел» — першы сотавы аператар Беларусі, які атрымаў ліцэнзію Міністэрства сувязі. СП было ўтворана ў студзені 1992 года прадпрыемствамі сувязі Беларусі і брытанскай кампаніяй Cable & Wireless Plc. У жніўні 2002 года ў ліцэнзію былі ўнесены папраўкі, якія прадаставілі «БелСел» права на стварэнне сеткі cdma2000. У чэрвені 2006 года аператар увёў у камерцыйную эксплуатацыю тэхналогію перадачы дадзеных 3G (трэцяга пакалення)
Цяпер удзельнікамі кампаніі з’яўляюцца нідэрландскае прадпрыемства CIB BV і беларускае ЗП «Джараш» з кіпрскім капіталам.
Як паведамляў БелаПАН, у сакавіку 2012 года РУП «Белтэлекам», якое валодала 50% сотавага аператара ТАА СП «БелСел», выйшла са складу яго заснавальнікаў, тлумачачы такі крок адсутнасцю прапаноў па развіцці бізнесу.
«Усе мы жывем у XXI стагоддзі — патрэбны новыя тэхналогіі, новыя падыходы. На жаль, у кампаніі, у якой мы працавалі, не было прапаноў па далейшым развіцці бізнесу, яна тэхнічна спынілася ў сваім развіцці. Сёння патрэбны тэхналогіі з вялікімі хуткасцямі доступу ў інтэрнэт. Тэхналогіі, якія былі ў кампаніі „БелСел“, не дазвалялі нам развіваць бізнес», — патлумачыў журналістам у чэрвені мінулага года пазіцыю «Белтэлекама» яго гендырэктар Сяргей Папкоў.
