Дзесяць геяў, якія змянілі сучасную музыку — відэа

Сёння дзень барацьбы з гамафобіяй – «Наша Ніва» прапануе вам падборку песняў ад аўтараў нетрадыцыйнай арыентацыі, якія змянілі сучасную музыку.

Элтан Джон – Skyline Pigeon

Творчасць Элтана Джона можа служыць сваеасаблівым падручнікам па тым, як ствараць сапраўды высокакласную папулярную музыку. Дарэчы, менавіта Элтан Джон быў першым сусветнавядомым папулярным музыкам, які ў 1979 наведаў Савецкі Саюз. Апошні альбом Элтана Джона выйшаў у 2010 годзе і стаў адным з найлпешых рэлізаў года. Элтан Джон афіцыйна ўзяў шлюб са сваім сябрам Дэвідам Фернішам.

Queen – Don’t Stop me Now

Фрэдзі Мэрк’юры стаў адной з самых яскравых фігур сусветнай рок-музыкі – альбом The Night in the Opera дагэтуль лічыцца адной з важнейшых кружэлак 1970-х. Сваю нетрадыцыйную арыентацыю Мэрк’юры ніколі не хаваў – болей за тое, назва гурта паходзіць ад мянушкі Мэрк’юры.

Літл Рычард – Tutti Frutti

Аўтар паловы класічных рок-н-ролаў, такіх як Tutti Frutti, Long Tall Sally, Keep a-Knockin’ Літл Рычард быў хіба што першым прадстаўніком папулярнай музыкі, які адкрыта заявіў пра сваю нетрадыцыйную арыентацыю, што для сярэдзіны ХХ стагоддзя было больш чым проста смелым учынкам.

Дасці Спрынгфілд – Son of a Preacher Man

Адна з самых прыгожых спявачак, Дасці Спрынгфілд, чый непаўторны голас стаў сімвалам поп-музыкі Мэмфіса і ваколіцаў, ніколі не афішавала сваю любоў да жанчын. Тым не менш, яе рамантычныя стасункі са спявачкай Нормай Тэнэга абраслі легендамі.

Лу Рыд – Walk on the Wil Side

Лідар The Velvet Unerground і адзін з асноўных паэтаў у гісторыі рок-музыкі Лу Рыд ніколі не хаваў сваю бісэксуальнасць, болей за тое, ён напісаў з тузін рамантычных песняў пра свае стасункі з персанажамі рознага пола, якія дагэтуль гучаць як невялікія шэдэўры. Пра песню Walk on the Wild Side Рыд казаў: «Калі б на радыё здагадваліся пра што яна, то не дакрануліся б да яе нават чапялой».

R.E.M. – Orange Crush

Майкл Стайп, лідар гурту R.E.M., стаў адным з лепшых аўтараў песняў апошніх трыццаці год. Менавіта яму належаць такія сусветныя хіты як Losing My Religion, Everybody Hurts і Man on the Moon. Пра сваю арыентацыю Майкл Стайп заявіў такім чынам: «Я не гомасэксуал, я не гетэрасэксуал, я проста сэксуал».

Руфус Уэйнрайт - Cigarettes & Chocolate Milk

Руфус Уэйнрайт, музыка ў трэцім пакаленні, стаў адным з тых, хто на пачатку 2000-‘ адрадзіў стылёвыю поп-музыку, якая спалучала ў сабе і традыцыі сінгер-санграйтэраў і кабарэ 30-х гадоў. У 2010 ён ажаніўся са сваім сябрам Ёрнам Уэйсбротам, хаця да сустрэчы з ім, па ўласных словах, не быў вялікім прыхільнікам гей-вяселляў.

Sigur Ros - Hoppippola

Ісландыскі пост-рок гурт Sigur Ros назаўжды змяніў ландшафт сусветнай музыкі – усе чатыры альбомы гурту сталі культавымі. Вакаліст Ёўн Тоўр Біргісан заўжды быў адкрытым гомасэксуалістам.

Placebo – Every You Every Me

Лідар Placebo – гурту, які яшчэ нядаўна акупіраваў усе музычныя каналы, Брайан Молка, аўтар пары тузіноў песняў, якія сталі класікай сярэдзіны дзевяностых, адкрыта казаў пра сваю бісэксуальнасць, што не перашкаджае яму мець шчаслівы шлюб з фатографам Хэленай Берг.

Antony & The Johnsons – Hope there’s Someone

Энтані Хагерці – любімец нью-ёркскай багемы, які лічыцца адным з самых цікавых сучасных элітарных артыстаў, не толькі прызнае сваю нетрадыцыйную арыентацыю, але і эпаціруе публіку песнямі кшталту I’m in Love with the Dead Boy.

• 0
• 0
• 0
• 0
• 0
• 1
• 0
• 0