Мірановіч: Хочацца перамагчы ўпершыню за 25 гадоў 2

У суботу, 25 мая, гандбольны СКА ў матчы ў адказ фіналу Кубка выкліку сустрэнецца на «Мінск-Арэне» з люксембургскім «Эшам».

У выязным матчы 18 мая СКА перамог у гасцях — 31:26.

З нагоды будучага паядынку клуб арганізаваў спецыяльную прэс-канферэнцыю з удзелам нязменнага трэнера Спартака Пятровіча Міронавіча. У прэс-канферэнцыі ўзялі таксама ўдзел гульцы Барыс Пухоўскі і Іван Мацкевіч і дырэктар клуба Павел Галкін.

«Усе разумеюць, што кубкавае супрацьстаянне ўключае два паядынкі. А ў нас ёсць традыцыя выступаць у гасцях лепш, чым дома. Таму ў нас прысутнічае невялікая трывога.

Хацелася б выйграць трафей ўпершыню амаль за 25 гадоў.

У каманды з Люксембурга цалкам нармальны ўзровень. Чакаем гульні…», — цытуе Спартака Мірановіча Прессбол.

«Як можна гуляць, калі не ставіць перад сабой вялікіх задач?

Вядома, можна жыць у куратніку і гэтым абмяжоўвацца. Але ў камандзе выдатная атмасфера, ёсць шмат маладых хлопцаў і старэйшых гульцоў з досведам. Мяркую, мы рухаемся правільна», — сказаў Павел Галкін.

Матч СКА — «Эш» пройдзе ў суботу, 25 мая, на «Мінск-Арэне». Пачатак а 18-й. Цана квіткоў 25 000 — 30 000 рублёў,

іх можна набыць праз ticketpro.by

Мінскі СКА быў шасціразовым чэмпіёнам СССР і пяць разоў перамагаў у еўракубках, апошні раз у 1990 г.

Таксама ў сераду, 29 мая, на «Мінск-Арэне» адбудзецца матч за залатыя медалі гандбольнага чэмпіянату Беларусі паміж СКА і «Дынама». Пачатак а 19-й.

СКА быў дзесяціразовым чэмпіёнам Беларусі, але апошні раз золата заваёўваў у 2002 г. Каб стаць зараз чэмпіёнам, патрэбна толькі перамога. «Дынама» — чэмпіёну ў 2009—2012 гг., дастаткова нічыёй.

nn.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ