Эстонія — Беларусь — 0:2. На трыбунах былі бел-чырвона-белыя сцягі 8

Нацыянальная зборная Беларусі па футболе правяла генеральную рэпетыцыю перад выездам на адборачны матч да чэмпіянату свету ў Хельсінкі . Сёння ў таварыскай гульні ў Таліне нашы падужаліся з эстонцамі.

Беларускія заўзятары ў Таліне. Фота vk.com/ultras_belarus

Парадаксальна, але менавіта ад эстонцаў беларусы нацярпеліся найбольш сярод усіх постсавецкіх зборных (тры паразы ў чатырох гульнях).

Кандрацьеў нечакана пакінуў у запасе Аляксандра Глеба і Віталя Радзівонава (абодва з’явіліся ў другой палове гульні). Затое на вастрыні атакі выйшаў навабранец зборнай Максім Скавыш.

У прынцыпе, такая замена сябе апраўдала. Менавіта Максім Скавыш на 32-ой хвіліне аддаў галявы пас на Антона Пуцілу. Макс мог біць сам, але не пашкадаваў аддаць перадачу на партнёра, які быў у больш выгадным становішчы — 0:1.

У другім тайме адным з вырашальных момантаў стала выдаленне Тааві Рахна. Абаронца эстонцаў перашкодзіў Аляксандру Паўлаву, які выходзіў сам-насам з брамнікам. Дацкі суддзя палез у кішэню за чырвонай карткай.

Шмат актыўнічаў Сяргей Балановіч. Спачатку ён не змог пераправіць мяч у вароты пасля ўдара Кісляка ў крыжавіну. А пазней аддаў пас-цукерку на Віталя Радзівонава — 0:2.

Дарэчы, забіваў Радзівонаў брамніку Каценку, які гуляе за магілёўскі «Дняпро». Быў яшчэ ў складзе эстонцаў Сідарэнкаў, які гуляе за Гомель.

Цяпер беларусы ў добрым настроі паромам перасякуць фінскі заліў, каб у пятніцу паспрабаваць атрымаць другую перамогу ў адборычным цыклі.

ЗП

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ