На паседжанні Штаба Аляксандра Мілінкевіча, што адбылося 28 сакавіка ў Мінску, вызначаныя тры асноўныя задачы, развязаннем якіх актывісты дэмруху зоймуцца ў бліжэйшыя дні.
Галоўная праца на сёння - аказанне ўсемагчымай падтрымкі людзям, якія адбываюць пакаранне арыштам за ўдзел у палітычнай кампаніі аб'яднаных дэмакратычных сіл. Будзе наладжана перадача ім у турмы прадуктаў харчавання, цёплых рэчаў і прадметаў асабістай гігіены. Каля спецпрыемніка-размеркавальніка па вуліцы Акрэсціна ў Мінску, дзе ўтрымліваецца асноўная маса арыштаваных, наладжана кругласуткавае дзяжурства прадстаўнікоў Штаба Аляксандра Мілінкевіча ці сяброўскіх грамадскіх праваабарончых арганізацый, у абавязкі якіх уваходзіць аказанне дапамогі сваякам арыштаваных, сустрэча і забеспячэнне транспартам дзеля ад'езду да хаты людзей, вызваленых з камераў па заканчэнні тэрміна пакарання. Арганізацыя аналагічнай работы плануецца і ў рэгіёнах Беларусі, дзе знаходзяцца ў арыштах удзельнікі дэмруху.
Цягам паседжання Штаба Аляксандр Мілінкевіч пацвердзіў свае словы аб тым, што ніводзін чалавек, які трапіў пад рэпрэсіі ўлады за падтрымку аб'яднаных дэмакратычных сіл, не застанецца без увагі і дапамогі. Кожнаму арыштаванаму, аштрафаванаму, збітаму, звольненаму з працы ці выключанаму з навучальнай установы чалавеку будзе аказаная неабходная дапамога. З гэтай мэтай Штабам прынятае рашэнне аб стварэнні агульнарэспубліканскага банка дадзеных пра ўсіх пацярпелых падчас кампаніі людзей. Займацца гэтай працай будзе адмысловая група Штаба на чале з намеснікам яго кіраўніка Віктарам Карнеенка.
Гэтая ж група будзе весці працу па складанні агульнарэспубліканскага спісу прадстаўнікоў улады і сілавых структур, якія парушылі закон цягам выбарчай кампаніі і ўдзельнічалі ў рэпрэсіях у дачыненні да грамадзянаў. У гэты спіс, паводле планаў, увойдуць дзяржаўныя чыноўнікі, суддзі і супрацоўнікі праваахоўных органаў, кіраўнікі прадпрыемстваў, арганізацый і навучальных установаў, члены выбарчых камісій, а таксама іншыя персоны, чый удзел у парушэннях закона і рэпрэсіях у дачыненні да ўдзельнікаў дэмруху будзе пацверджаны дакументальна альбо пераканаўчымі паказаннямі сведак.
Штаб мае намер звярнуцца да ўсіх грамадзянаў Беларусі, журналістаў беларускіх і замежных СМІ з просьбай прадставіць адпаведныя пісьмовыя, фота-, відэа- і аудыёдакументы, а таксама сведчанні актывістаў дзеля складання банку дадзеных пацярпелых і разгляду пытання аб аказанні канкрэтнай дапамогі кожнаму з іх і спіса парушальнікаў закона, які будзе агалошаны і перададзены ў міжнародныя арганізацыі дзеля прымянення адпаведных санкцый.
