Расіец арганізаваў у Брэсцкай вобласці незаконную фінансавую структуру 1
Фінансавая міліцыя спыніла дзейнасць грамадзяніна Расіі, які з дапамогай індывідуальных прадпрымальнікаў арганізаваў незаконны фінансавы бізнэс у Беларусі.
Як паведаміла прэс-служба Камітэта дзяржаўнага кантролю, у ходзе правядзення сумесных кантрольных мерапрыемстваў супрацоўнікі Баранавіцкага і Кобрынскага аддзелаў фінансавых расследаванняў КДК выявілі злачынную групу, кіраўніком якой быў грамадзянін Расійскай Федэрацыі. У 2012 годзе ён зарэгістраваў у якасці індывідуальных прадпрымальнікаў двух жыхароў Кобрына і трох жыхароў Баранавіч і ажыццяўляў ад іх імені незаконную прадпрымальніцкую дзейнасць, у выніку якой дзяржаве была нанесеная значная шкода.
Па ўказанні кіраўніка злачыннай групы дадзеныя прадпрымальнікі адкрылі разліковыя рахункі ў банках, атрымалі бланкі таварна-транспартных і таварных накладных, якія з верасня 2012 года па чэрвень 2013 года выкарыстоўваліся ўдзельнікамі злачыннай групы для ўвядзення ў легальны абарот і вывядзенне з яго таварна-матэрыяльных каштоўнасцяў, набытых за наяўны разлік. За гэты час дзяржаве была нанесеная шкода ў выглядзе нявыплачаных падаткаў у суме 2,2 млрд рублёў.
У дачыненні да арганізатара злачыннай групы Кобрынскім міжраённым аддзелам фінансавых расследаванняў распачатая крымінальная справа па прыкметах злачынства, прадугледжанага ч.2 арт.234 (ілжэпрадпрымальніцтва) Крымінальнага кодэкса Беларусі. Санкцыя гэтага артыкула прадугледжвае пазбаўленне волі на тэрмін ад трох да дзесяці гадоў з канфіскацыяй маёмасці або без канфіскацыі.
