У Сафіі, сталіцы Балгарыі, балгары ўжо 40 дзён працягваюць пратэставаць, патрабуючы адстаўкі ўраду.
22 ліпеня каля 80 чалавек сабраліся перад парламентам папіць кавы, прапануючы гэты напой таксама мінакам. Гэтае традыцыйнае «кавапіццё», скіраванае супраць цяперашняга сацыялістычнага ўрада прэм’ер-міністра Пламена Арашарскага, адбылося ўжо 27-мы дзень запар. Надвячоркам пратэстоўцы з-пад парламента далучыліся да антыўрадавага маршу, які ў сталіцы Балгарыі адбываецца штодня, пачынаючы з 14 чэрвеня. Сёння чакаецца ўжо 40-ы антыўрадавы марш у Сафіі.
Пратэстоўцы патрабуюць адстаўкі ўраду Пламена Арашарскага. Кажуць, што яны гатовыя паставіць рэкорд у Кнізе Гінэса па працягласці пратэстаў, калі ўрад, як цяпер, будзе адмаўляцца ісці ў адстаўку.
Пратэсты, якія пачаліся ў сярэдзіне чэрвеня, былі выкліканы назначэннем медыйнага магната Дэлана Пееўскага на пасаду шэфа дзяржаўнай службы бяспекі, якая займаецца, сярод іншага, расследаваннем арганізаванай злачыннасці. Але для шмат каго ў Балгарыі сам Пееўскі бачыцца як асоба, ангажаваная ў кантакты з крымінальным светам.
Прэм’ер-міністр Арашарскі скасаваў прызначэнне Пееўскага, але пратэсты не спыніліся, бо балгары лічаць, што цяперашні ўрад, у якім галоўную ролю адыгрываюць сацыялісты (колішнія камуністы), падтрымлівае непразрыстыя кантакты з іншымі балгарскімі алігархамі.
Нікола Петраў, журналіст сайту novinite.com, сказаў, што на штодзённыя антыўрадавыя маршы ў сталіцы Балгарыі збіраецца як мінімум некалькі тысяч удзельнікаў, а час ад часу выходзяць на іх і па 20 тысяч чалавек.
