Балаховіч і бел-чырвона-белы сцяг на падпольнай польскай марцы 8

Цана яе невысокая — сягае ад аднаго да трох даляраў.

Нелегальная марка прысвечаная генералу Станіславу Булак-Балаховічу і змаганню за беларускую незалежнасць. На ёй змешчаная чорна-белая выява атамана на кані, а таксама бел-чырвона-белы сцяг. Пад сцягам подпіс — «Беларусь, Польская пошта, 100 злотых». Ёсць таксама пазнака: «Цяпер пад савецкай акупацыяй». Марка гэтая была нелегальна выдадзеная ў 1987 годзе тагачасным польскім рухам супраціву — Салідарнасцю.

«Беларуская» марка паходзіць з серыі, прысвечанай іншым акупаваным рэспублікам СССР, якія змагаліся за незалежнасць і трапілі пад гнёт бальшавікоў, — Літве, Латвіі, Эстоніі, Украіне, Грузіі, Расіі.

Зразумела, што нелегальныя маркі польскай Салідарнасці не выдаваліся афіцыйна, а друкаваліся ў прыватных таемных друкарнях. За іх захоўванне можна было трапіць пад суд.

Маркі тыя адыгралі ў Польшчы значную ролю ў барацьбе з камуністычным рэжымам. Яны былі адным з сімвалаў непадпарадкавання тагачасным уладам. Прыбытак ад продажу марак прызначаўся для падтрымкі таемных структураў Салідарнасці. Грошы, атрыманыя ад продажу ішлі, на выданне ўлётак і іншых паліграфічных матэрыялаў.

Маркі выдаваліся нецэнтралізавана ад пачатку ваеннага становішча. Іх рабілі розныя суполкі Салідарнасці па ўсёй Польшчы. Таму маркі розняцца па якасці — існуюць проста кавалачкі грубой паперы, аддрукаваныя на ротапрынце, а ёсць і сапраўдныя каляровыя шэдэўры з зубцамі і на якаснай паперы.

Лічыцца, што агулам за час ваеннага становішча ў Польшчы было выдадзена да 35 тысяч відаў марак, наклад якіх сягаў ад некалькі сотняў да некалькі тысяч.

Руслан Равяка

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ