Як паведамілі ў аддзяленні інфармацыі і грамадскіх сувязяў УУС Мінскага аблвыканкама, 21 жніўня прыблізна ў 22.30 у Мінскі РАУС паступіла паведамленне аб тым, што ў адным з прыватных дамоў у Заслаўі 75-гадовы мясцовы жыхар ударыў нажом свайго 41-гадовага зяця, а затым і 42-гадовую дачку, пасля чаго паспрабаваў учыніць самагубства, нанёсшы сабе некалькі нямоцных парэзаў нажом па горле і венах на руцэ.
У Мінскай абласной клінічнай бальніцы, куды былі дастаўлены ўсе трое, паведамілі, што больш за ўсіх пацярпела жанчына — у яе пранікальныя раненні грудзей, раненне сэрца і лёгкага.
Папярэдне ўстаноўлена, што напярэдадні вечарам пенсіянер, знаходзячыся ў стане алкагольнага ап'янення, пасварыўся з зяцем, пасля чаго схапіў нож і ўдарыў ім сваяка ў плячо. Калі дачка заступілася за мужа, састарэлы мужчына некалькі разоў ударыў нажом і яе, пасля чаго пайшоў у свой пакой і паспрабаваў парэзаць сабе шыю і рукі.
Паводле слоў суседзяў, апошнім часам сваякі часта сварыліся з-за спадчыны, што засталася пасля смерці жонкі пенсіянера і, адпаведна, маці пацярпелай. Сапраўдныя прычыны здарэння ўстановіць следства.
22 жніўня Мінскім раённым аддзелам Следчага камітэта ў дачыненні да нападніка была распачата справа на падставе ч. 1 арт. 14, п. 1 ч. 2 арт. 139 КК (замах на забойства двух і больш чалавек). Затрыманы змешчаны ў ізалятар часовага ўтрымання.
