Абвінавачаны ў жорсткім забойстве дзяўчыны ў Рэчыцы змешчаны пад варту

Галоўным следчым упраўленнем Следчага камітэта Беларусі працягваецца расследаванне абставінаў забойства дзяўчыны ў Рэчыцы 29 жніўня.

Як паведамілі ў аддзеле інфармацыі і сувязі з грамадскасцю СК, выканана больш за сто следчых дзеянняў. Прызначаны экспертныя даследаванні, якія ажыццяўляюць спецыялісты Дзяржаўнага камітэта судовых экспертыз. У якасці рэчавых доказаў канфіскавана і далучана да матэрыялаў крымінальнай справы больш чым сто розных аб’ектаў. Цяпер яны вывучаюцца следчымі і экспертамі.

Па падазрэнні ва ўчыненні злачынства затрыманы жыхар Рэчыцы 1994 года нараджэння.

Яму прад’яўлена абвінавачанне ва ўчыненні забойства з асаблівай жорсткасцю (п. 6 ч. 2 арт. 139 КК). Ён зняволены пад варту.

Нагадаем труп 19-гадовай дзяўчыны быў знойдзены 29 жніўня ў шэсць раніцы вартаўніком каля Дома творчасці моладзі. Смерць была гвалтоўнай, на целе забітай знойдзены множныя пашкоджанні, у тым ліку сляды ад удараў. У той жа дзень быў затрыманы падазраваны — 19-гадовы раней неаднаразова судзімы мясцовы жыхар, які быў знаёмы з дзяўчынай.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ