Па выніках актыўных міжнародных пошукаў было прынятае рашэнне, што Дэпартамент гісторыі Еўрапейскага гуманітарнага ўніверсітэта (Вільня) узначаліць доктар гуманітарных навук Віленскага ўніверсітэта Юсціна Пашкене, паведамляе прэс-служба ўніверсітэта.
Да прыходу ў ЕГУ д-р Пашкене была намесніцай дэкана па пытаннях навукі і дактарантуры Гістарычнага факультэта Віленскага ўніверсітэта.
У яе працоўныя абавязкі будзе ўваходзіць кіраванне акадэмічнымі праграмамі ЕГУ ў галіне культурнай спадчыны, а таксама новымі і цяперашнімі даследчымі ініцыятывамі.
Яна мае значны акадэмічны досвед у галіне археалогіі і даследаванняў культурнай спадчыны, вопыт кіраўнічай працы і паспяховай рэалізацыі міжнародных даследчых праектаў.
Ад 2003 года д-р Пашкене працавала выкладчыцай кафедры Тэорыі гісторыі і гісторыі культуры і займала пасаду намесніцы дэкана Гістарычнага факультэта Віленскага ўніверсітэта. Ад 2006 г. адмініструе і кіруе праектамі, якія падтрымлівае Еўрасаюз, накіраванымі на павышэнне якасці праграм, зазначае прэс-служба ЕГУ
Д-р Пашкене – старшыня рады па ацэнцы культурнай спадчыны пры Дэпартаменце культурнай спадчыны Міністэрства культуры Літвы. Сфера навуковых зацікаўленняў — археалогія Сярэднявечча і Новага часу, тэорыя і практыка археалогіі і культурнай спадчыны.
Раней Дэпартамент гісторыі ЕГУ узначальваў Павел Церашковіч,
у сакавіку 2013 г. ён быў звольнены з пасады кіраўніка дэпартамента гісторыі ЕГУ, але застаўся кіраўніком сената, даследчага цэнтру і выкладчыкам універсітэта.
З канца сакавіка 2013 г. кіраўніцтва дэпартаментам гісторыі да асобнага рашэння кіраўнічай рады ўніверсітэта прыняў на сябе прарэктар па акадэмічных пытаннях прафесар Аляксандр Каўбаска.
Еўрапейскі гуманітарны ўніверсітэт быў заснаваны ў 1992 г. у Мінску. У 2004 г. быў зачынены ўладамі, праз год аднавіў дзейнасць у Літве, атрымаўшы статус літоўскага ўніверсітэта.
Бакалаўраў рыхтуюць па праграмах беларусістыкі, віртуальнага дызайна і медыя, культурнай спадчыны, медыі і камунікацый. Ёсць магістратура, PнD-праграма.
Навучаецца каля 1600 чалавек, у тым ліку на вочнай форме бакалаўрыяту каля 500 чалавек, завочнай - 900, магістратуры -- 200, дактарантуры -- 6. Студэнты вочнай формы навучаюцца і жывуць у Вільні.
Каментары