21 верасня (субота) Студэнцкае этнаграфічнае таварыства і Дзяржаўны літаратурны музей Янкі Купалы запрашаюць у Вязынку (Маладзечанскі раён) адзначыць традыцыйнае восеньскае свята «Багач».
У беларускім календары «Багач» прымеркаваны да заканчэння збору ўраджая («к гэтаму часу ў кожнага ўсяго багата») і першаму запальванню хатняга агменю — васковай свечкі ў лубцы з жытам, якую ставяць на покуць і захоўваюць там на працягу ўсяго года, што прыносіць у дом багацце і шчасце. Гэтыя надзвычай важныя і прыгожыя рэчы і натхняюць на правядзенне свята.
На свяце выступяць спеўныя і інструментальныя гурты «Горынь», Dainava, Guda, «Кудмень», «Рада», «На Таку», для дзяцей і дарослых пройдуць разнастайныя майстар-класы па рамёствах. Таксама будзе працаваць гульнявая пляцоўка, кірмаш.
Падчас свята можна будзе пакаштаваць стравы традыцыйнай кухні і патанцаваць.
Пачатак а 12-й.
Як даехаць: электрычка з Мінска едзе ў 10.50 (наступная ў 11:53), прыбывае ў Вязынку ў 11.42. Назад з Вязынкі можна ехаць у 16.07, 16.45, 17.57.
Удзел у свяце вольны, але для ўваходу на тэрыторыю музея трэба будзе купіць квіток. Цана ўваходнага квітка 10 000, студэнтам 7 000, школьнікам 5 000.
Кантакт: 8-029-842-57-89 (Наста)
