Грамадскі актывіст, лідар «Zmena» Павел Вінаградаў сёння вызваляўся пасля 15-суткавага арышту з Цэнтра ізаляцыі парушальнікаў на Акрэсціна, але сябры і журналісты, што чакалі яго пад брамай турмы, не пабачылі.
Праз нейкі час яго жонка Святлана дазналася, што Паўла адвезлі ў пасёлак Сокал пад Нацыянальны аэрапорт, каб яго не сустрэлі сябры.
Гэта не першы выпадак, калі грамадскіх актывістаў звозяць так за межы Мінска.
Павел Вінаградаў — грамадскі актывіст, лідар моладзевага крыла «Змена» кампаніі «Гавары праўду». Адседжваў тэрмін за «Плошчу-2010», пасля неаднаразова затрымліваўся і атрымоўваў адміністрацыйныя суткі (15 адм. арыштаў, колькасць сутак, праведзеных на Акрэсціна набліжаецца да 100) за крэатыўныя акцыі. Апошнія 15 сутак Павел адбываў за «пратэст свіных галоваў» на Плошчы Якуба Коласа.
