31-гадовага Аляксандра шукалі тыдзень. 3 кастрычніка жонка звярнулася ў міліцыю: муж раніцай паехаў прадаваць «Міцубісі Карызма» з Лельчыцаў у Жыткавічы і не вярнуўся. Спачатку завялі крымінальную справу па факце знікнення. Калі ж следчыя прыйшлі да высновы, што адбылося забойства, справу перакваліфікавалі.
11 кастрычніка ў Лельчыцах па падазрэнні ў забойстве затрымалі двух маладых людзей, 1991 г.н. Абодва беспрацоўныя. Адзін з іх быў знаёмы з Аляксандрам.
На забойства рашыліся, калі даведаліся пра вялікую суму грошай у мужчыны – вёз дадому 4800 даляраў.
Папярэдне ўстаноўлена, што падазраваныя падвозілі Аляксандра з Жыткавіч у Лельчыцы. А як толькі выехалі за горад, накінуліся на яго. Калі мужчыну збілі да смерці, забралі ў яго грошы.
А цела праз некалькі кіламетраў выкінулі ў канаву паміж полем і лесам, перад гэтым напхаўшы пад адзенне цаглінаў.
Прадстаўнік УСК па Гомельскай вобласці Марыя Крываног паведаміла, што цяпер маладыя людзі знаходзяцца ў ізалятары часовага ўтрымання ў Жыткавічах. Іх паказанні правяраюцца. Прызначаны шэраг экспертыз.
Вядома, што ў Аляксандра засталася маладая жонка.