Камітэтам дзяржаўнай бяспекі спынена супрацьпраўная дзейнасць міжнароднай злачыннай групы, якая арганізавала схему ўвозу на тэрыторыю Мытнага саюза грузавых аўтамабіляў і аўтобусаў з ухіленнем ад выплаты мытных плацяжоў у асабліва буйным памеры.
У рэалізацыю «ценявой» схемы былі таксама ўцягнутыя супрацоўнікі беларускіх мытных органаў, а таксама грамадзяне Беларусі, Расіі і Польшчы.
Два індывідуальных прадпрымальніка з горада Бяроза Брэсцкай вобласці куплялі ў краінах Еўрасаюза поўнакамплектныя аўтамабілі. Каб пазбегнуць выплаты мытных плацяжоў у поўным аб'ёме, на тэрыторыю Мытнага саюза грузавыя аўтамабілі ўвозілі па частках: у выглядзе шасі і кабіны. У Беларусі аўтамабілі зноў збіралі і прадавалі.
Аналагічная схема ўжывалася камерсантамі пры зборцы аўтобусаў, з якіх да ўвозу ў Беларусь здымаліся рухавікі і хадавая частка.
— Падчас агляду плошчаў, якія арандуюцца прадпрымальнікамі, выяўленыя і затрыманыя ўжо сабраныя і гатовыя да эксплуатацыі восем грузавых аўтамабіляў вядомых еўрапейскіх марак, увезеныя і размытненыя ў 2013 годзе па частках.
Пры гэтым устаноўлена, што на некаторыя з аўтамабіляў былі вырабленыя падробленыя дакументы, якія сведчаць аб іх вытворчасці на адным з камерцыйных прадпрыемстваў Пскова (Расійская Федэрацыя), — паведамляе прэс-рэліз ведамства.
Мытныя органы падлічылі — агульны памер ухілення ад выплаты мытных плацяжоў пры ўвозе толькі чатырох з затрыманых транспартных сродкаў склаў 1,3 млрд рублёў.
Паводле атрыманай інфармацыі камерсантамі ў перыяд 2010-2013 гг. з выкарыстаннем «ценявой» схемы было ўвезена каля двухсот аўтамабіляў. Арыенціровачная сума не атрыманых дзяржавай мытных плацяжоў — больш за 4 млн еўра.
У рэалізацыю «ценявой» схемы былі таксама ўцягнутыя беларускія мытнікі — КДБ выявіла датычнасць двух прадстаўнікоў мытных органаў.
Устаноўлена, што супрацоўнікі мытні неаднаразова атрымлівалі ад камерсантаў незаконныя грашовыя ўзнагароды ў выглядзе хабараў.
Упраўленнем КДБ па Брэсцкай вобласці ў дачыненні да службовых асоб мытных органаў распачатыя крымінальныя справы па прыкметах складу злачынства, прадугледжанага ч. 1 і ч. 2 арт. 430 КК («Атрыманне хабару»).
У дачыненні да індывідуальных прадпрымальнікаў распачатыя крымінальныя справы па прыкметах складу злачынстваў, прадугледжаных ч. 2 арт. 231 КК («Ухіленне ад выплаты мытных плацяжоў у буйным памеры») і ч. 2 арт. 431 КК («Дача хабару»).
У рамках расследавання крымінальнай справы праводзіцца комплекс аператыўна-вышуковых і следчых мерапрыемстваў, накіраваных на выяўленне і дакументаванне ўсіх эпізодаў супрацьпраўнай дзейнасці падазраваных.
