Чаргінец напісаў новы раман. Адзін з персанажаў — здраднік Ліпковіч
Дзяржаўнае выдавецтва «Мастацкая літаратура» выпусціла новы раман старшыні афіцыйнага Саюза пісьменнікаў Мікалая Чаргінца. Твор называецца «Аперацыя «Кроў». Раман адкрывае новую старонку «барацьбы насельніцтва Беларусі з нямецка-фашысцкімі захопнікамі», адзначаецца ў анатацыі.
Звяртае ўвагу, што адным з персанажаў твору стаў яўрэй-здраднік Ліпковіч. «Яны выклікалі агіду нават у гаспадароў, якім служылі, што пісьменнік цудоўна паказаў праз вобраз ката Ліпковіча», — зноў словы з анатацыі.
Прапануем некаторыя ўрыўкі з рамана.
« – Ты там жа жывеш, на Беламорскай?
– Вядома, там жа наш дом.
– А Ліпковіча не ведаеш?
– Як не ведаю, ён жа недалёка жыве.
– Здаецца, ён з немцамі выдатна знюхаўся. Аўсвайсы мае, без апазнавальных габрэйскіх нашывак ходзіць. Але ён жа заўсёды сволаччу быў, стукаў у НКВД на суседзяў, а цяпер вось перакваліфікаваўся».
«Чуў, як Антончык у размове са сваімі сябрукамі згадваў прозвішча Ліпковіча. Антончык казаў, што з Ліпковічам яны нарабавалі шмат золата, здзіўляўся, што
Ліпковіч па нацыянальнасці габрэй, але гэта зусім не перашкаджала яму рабаваць і забіваць сваіх супляменнікаў. І яшчэ, Антончык вельмі шкадаваў, што яны разам з Ліпковічам рыхтаваліся адпомсціць гестапа за тое, што арыштавалі і спалілі ў Трасцянцы сям'ю Ліпковіча. Але адбыўся выпадковы выбух.
— А ты не ведаеш, дзе зараз гэты Ліпковіч?
Гэтыя пытанні задаваліся яму і раней. Абрам паўтараў свае паказанні, дадаваў нешта новае.
— Не ведаю. Але, са слоў Антончыка, Ліпковіч выжыў і дзесьці лечыцца, здаецца, у шпіталі.
— А што яшчэ ты ведаеш пра Ліпковіча?
— Больш нічога. — Раптам Абрам вырашыў, што будзе не лішнім сказаць, што Ліпковіч сябраваў з тым гестапаўскім палкоўнікам, якога выкралі».
Скончылася ўсё для Абрама Ліпковіча вельмі сумна. «Мінула яшчэ чатыры дні, і немцы атрымалі яшчэ адзін удар. Ліпковіч, не прыходзячы ў прытомнасць, памёр у турме».
Блогер Яўген Ліпковіч некалі зладзіў перформанс са спальваннем кніг Мікалая Чаргінца. Потым старшыня Саюза пісьменнікаў прыцягнуў Ліпковіча да адказнасці за абразы ў блогу. Ліпковіч атрымаў штраф. Была нават спроба завесці крымінальную справу супраць блогера, аднак гэта так і не было рэалізавана.
Сам Яўген Ліпковіч наступным чынам пракаментаваў гэта: «Ён усіх папярэджваў, што такое напіша. Чаму не? Мне падабаецца. Не буду пісаць твор, у якім героем будзе Чаргінец. Ён робіць усё магчымае, каб я ўвайшоў у гісторыю. Удзячны яму за піяр. Я, вядома, адкажу. Але не буду заклікаць знішчаць кнігі. Будуць іншыя адказы».
Цяпер чытаюць
Сілавікі затрымалі лідара гурта «Палац» Алега Хаменку3
Каментары