Доўгачаканы праект закона «Аб беларусах замежжа» паступіў у палату прадстаўнікоў.
Гэта не першы раз, калі праект закона пасля ўзгаднення паміж усімі зацікаўленымі дзяржаўнымі ўстановамі фактычна дайшоў да апошняй стадыі разгляду. Такое ўжо было ў 2002 годзе. Тады праект закона меў назву «Аб суайчынніках, якія пражываюць за мяжой», але з незразумелых прычынаў прыняцце закона так і не адбылося, і ён надоўга выпаў з прыярытэтаў дзяржаўнай замежнай палітыкі.
Неабходнасць прыняцця закона Згуртаванне беларусаў свету «Бацькаўшчына» агучвала даўно: з 2001 года гэтае пытанне было асноўным у парадку дня працы з’ездаў беларусаў свету, што склікаюцца «Бацькаўшчынай» кожныя чатыры гады.
Больш за тое, на з’ездах не толькі прымаліся звароты да ўрада з заклікам прыняць адпаведны закон, дэлегаты выходзілі з канкрэтнымі прапановамі, датычнымі зместу закона.
Практычна гатовы законапраект быў накіраваны Згуртаваннем ва Урад па выніках і Чацвёртага (2005 г.), і Пятага (2009 г.) з’ездаў беларусаў свету.
Гэты дакумент быў складзены з улікам меркавання дыяспары, а таксама падобнага заканадаўства іншых унітарных краінаў. «Бацькаўшчына» прапанавала назваць законапраект «Аб беларусах замежжа».
У канцы 2009 года пры Нацыянальным цэнтры заканадаўства і прававых даследаванняў Рэспублікі Беларусь зноў была створаная працоўная група па распрацоўцы законапраекта, у яе ўвайшлі прадстаўнікі дзяржаўных устаноў Беларусі і грамадскіх арганізацый, што працуюць з беларускай дыяспарай, у тым ліку і «Бацькаўшчыны».
У выніку быў распрацаваны законапраект, які ўсё ж атрымаў назву «Аб беларусах замежжа». Некалькі год законапраект вандраваў па розных дзяржаўных установах дзеля ўзгадненняў, і, адпаведна, змяняўся яго змест.
Апошнім часам над канчатковым варыянтам законапраекта перад падачай у палату прадстаўнікоў працавала Міністэрства замежных спраў Беларусі, больш за тое, у выпадку прыняцця закону асноўная нагрузка па яго выкананні будзе класціся менавіта на гэтую дзяржаўную ўстанову.
У сувязі з гэтым Згуртаванне «Бацькаўшчына» звярнулася да начальніка галоўнага ўпраўлення шматбаковай дыпламатыі Міністэрства замежных спраў Рэспублікі Беларусь Юрыя Амбразевіча па каментар адносна законапраекта і яго далейшага лёсу.
Адказы Юрыя Амбразевіча чытаць па гэтай спасылцы